ގާސިމް މި ގޮތަށް އެދިވަޑައިގެންފައިވަނީ ޕޮލިސް ކޮމިޝަނަރު އަލީ ޝުޖާއުއަށް ފޮނުއްވި ސިޓީއެއްގައެވެ. އެ ސިޓީގައި ގާސިމް ވިދާޅުވީ އދ. މާމިގިލީގައި ހަދަން ނިންމާފައިވާ ފުލުހުންގެ އިމާރާތް އެޅުން ވަރަށް ބޮޑަށް ލަސްވެފައިވާކަމަށެވެ.
މާމިގިލީގައި ޕޮލިސް ސްޓޭޝަނެއް އެޅުމަށް މިދިޔަ ސަރުކާރުގައިވެސް ދައުލަތުގެ ބަޖެޓުގައި ފައިސާގެ އަދަދުތަކެއް ޖެހިކަމަސާއި އެހެންނަމަވެސް އެ ކަމުގައި އުޅެމުންދާ ދަތި ހާލު ވަޒަން ކުރެއްވޭކަމަށް ގާސިމްގެ ސިޓީގައި ވަނީ ވިދާޅުވެފައެވެ. އެހެންކަމުން މާމިގިލީ ޕޮލިސް ސްޓޭޝަން ގާސިމްގެ ހަރަދުގައި އެޅުމުގެ ހުއްދައަށް އޭނާ ވަނީ އެދިވަޑައިގެންފައެވެ.
ގާސިމްގެ ސިޓީގައި ވަނީ އދ. އަތޮޅުގައި ކުށްކުރުން އެންމެ ގިނައީ ވެސް މާމިގިލީގައިކަމަށް ފުލުހުންގެ ތަފާސް ހިސާބުތަކާއި ހަވާލައްދެއްވާ ވިދާޅުވެފައެވެ. އެހެންކަމުން ފުލުހުންގެ ހިދުމަތް ދިނުމަށް ރީޖަނަލް ފެންވަރުގެ ސްޓޭޝަނެއް ގާއިމް ކުރުމަށް އެކި ފަހަރު މަތިން ވާހަކަތައް ދެއްކެވިކަން ގާސިމް ވަނީ ފާހަގަކުރައްވާފައެވެ.
މީގެއިތުރުން މާމިގިލީގައި އިންޓަނޭޝަނަލް އެއާޕޯޓެއްގެ އިތުރުން އެ ރަށުގެ ވަށައިގެން ގިނަ އަދަދެއްގެ ރިސޯޓުތަކެއް އޮޕަރޭޓްކުރަމުން އަންނާތީ ހިދުމަތްތައް ހޯދަން ގިނަ ބަޔަކު މާމިގިއްޔަށް ޒިޔާރަތްކުރާކަންވެސް ގާސިމް ފާހަގަކުރެއްވިއެވެ.
