
ނަމަވެސް މިވަގުތު ކަނދުފަތި އަޅާ އެންމެ ސެންޓަރެއް ހުރުމުގެ ސަބަބުން ގިނަ ދަތިތަކާ ކުރިމަތިލާންޖެހޭ ކަމަށް މެރިން ރިސޯސަސް މިނިސްޓްރީން ބުނެއެވެ.
މިވަގުތު ރާއްޖޭގައި ހުރީ ހުޅުމާލޭގައި ގާއިމުކޮށްފައިވާ އެންމެ ސެންޓަރެކެވެ. އަދި މި ސަރުކާރުން މިހާތަނަށް ވަނީ 29 ކަނދުފަތި އަޅާފައެވެ. އޭގެ ތެރޭގައި ހިމެނެނީ ކަޅުބިލަމަހުގެ މަސްވެރިކަމަށް ހާއްސަކޮށްފައިވާ 18 ދޮށީގެ ކަނދުފައްޗާއި 11 ވަދު ކަދުފައްޗެވެ.
އިތުރުވަމުންދާ ޑިމާންޑަށް އަމާޒުކޮށް، ސަރުކާރުން ވަނީ ރާއްޖޭގެ އުތުރާއި ދެކުނުގައި އިތުރު ދެ ސެންޓަރު އެޅުމަށް ނިންމާފައެވެ. މިގޮތުން ށ. ފުނަދޫއާއި ގދ. ވާދޫގައި ކަނދުފަތި އަޅާ ސެންޓަރުތައް ގާއިމުކުރެވޭނެއެވެ. މެރިން ރިސޯސަސް މިނިސްޓަރު އަހުމަދު ޝިޔާމް ވިދާޅުވި ގޮތުގައި ފުނަދޫގެ ސެންޓަރުގެ މަސައްކަތް މިއަހަރުގެ ތެރޭގައި ނިމޭނެއެވެ.
މީގެ އިތުރުން ށ. ފޭދޫ ސަރަހައްދުގައި ވެސް ސްޕޯޓްސް ފިޝިން ކަނދުފައްޗެއް ގާއިމުކުރުމަށް މަޝްވަރާތައް ކުރިއަށްދާ ކަމަށް މިނިސްޓްރީން ބުނެފައިވެއެވެ.