ރައީސް ޑރ. މުއިއްޒާއި އެމަނިކުފާނު އެންމެ އިތުބާރުކުރައްވާ އަދި އެންމެ އަރިސްކޮށް ހުންނެވި އަބްދުއްރަހީމާ ދެމެދުގައި އޮތް ގުޅުން އިންތިހާއަށް ގޯސްވެފައިވާ ކަމުގެ އަޑުތައް ފެތުރިފައި ވަނިކޮށް މިއަދު ވަނީ ދެބޭފުޅުން ބައްދަލުކުރައްވާފައެވެ.
މި ބައްދަލުކުރެއްވުމާއި ގުޅޭގޮތުން ސަރުކާރުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ ރައީސް މުއިއްޒު މަޖިލީހުގެ ރައީސް އަބްދުއްރަހީމާއި ބައްދަލުރެއްވީ ޕީ.އެން.ސީގެ ޕީ.ޖީ ލީޑަރު އިބްރާހީމް ފަލާޙްއާއެކުކަމަށެވެ. އަދި މި ބައްދަލުކުރެއްވުމުގައި މަޝްވަރާކުރެއްވީ މަޖލީހުގެ މަސައްކަތްތަކާއި ގުޅޭގޮތުންކަމަށް ހީނާ ވިދާޅުވިއެވެ.
ރައިސް ޑރ. މުހައްމަދު މުއިއްޒާއި އެމަނިކުފާނާއި އެންމެ އަރިސްކޮށް ހުންނެވި އަބްދުއްރަހީމްގެ ގުޅުން ގޯސްވެފައިވާކަމަށް އަބްދުއްރަހީމް ވަނީ ވިދާޅުވެފައެވެ. އަދި މި ކަންތަކުގެ ތެރެއިން އަބްދުއްރަހީމާއި ގުޅުން ހުރި ބައެއް ބޭފުޅުން ވަނީ ސަރުކާރުގެ މަގާމުތަކުން ވަކިކޮށްފައެވެ.
އެގޮތުން ޓްއަރިޒަމް މިނިސްޓާރިކަމުގެ މަގާމުގައި ހުންނެވި އަބްދުއްރަހީމްގެ ދަރިކަލުން އިބްރާހިމް ފައިސަލް ވަނީ ކުއްލި ގޮތަކަށް މިދިޔަ އަންގާރަ ދުވަހު މަގާމުން ވަކިކޮށްފައެވެ. އަދި ފައިސަލް މަގާމުން ވަކިކުރިތާ ހަފްތާއެއް ނުވަނީސް އެމްޕީއެލްގެ މެނޭޖިން ޑިރެކްޓަރުގެ މަގާމުގައި ހުންނެވި މުހައްމަދު ވަޖީހު އިބްރާހީމްވެސް ވަނީ މަގާމުން ވަކިކޮށްފައެވެ. ވަޖީހަކީ ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲގެ ދަރިކަނބަލުންގެ ބަފާބެއެވެ. ވަޖީހުގެ ދަރިކަލުން އަހުމަދު ހިޝާމް ވަޖީހު ހުންނެވި ރައީސް އޮފީހުގެ ލީގަލް އެފެއާޒް މިނިސްޓަރުގެ މަގާމުގައެވެ.
މި ދެބޭފުޅުން މަގާމުން ވަކިކުރި ސަބަބެއް ސަރުކާރަކުން ހާމައެއް ނުކުރެއެވެ.
