އުނގޫފާރުގައި ހުންނަ ކައުންސިލް އިދާރާއަށް ސިހުރު ހަދައިގެން ހައްޔަރުކުރީ އެރަށު ރިވެލިގެ އުމުރުން 61 އަހަރުގެ މުހައްމަދު އަމްޖަދާއި އެރަށު ނަސީމީ ހިޔާ އުމުރުން 67 މުހައްމަދު ވަހީދުއެވެ.
ފުލުހުން ބުނީ ކޯޓް އަމުރެއްގެ ދަށުން މި ދެމީހުން ހައްޔަރުކުރީ މިދިޔަ ހުކުރު ދުވަހުކަމަށެވެ. އަދި މި މީހުންގެ ބަންދާއި މެދު ގޮތެއް ނިންމަން ކޯޓަށް ގެންދިޔުމުން 15 ދުވަހުގެ މުއްދަތަށް ޖަހާދީފައިވާކަމަށްވެސް ފުލުހުން ބުނެއެވެ.
ފަހަކަށް އައިސް ރާއްޖޭގެ އެކި ހިސާބުތަކުގައި ސިހުރު ހަދައިގެން ފުލުހުންނަށް ލިބޭ ރިޕޯޓްތައް އަންނަނީ އިތުރުވަމުންނެވެ.
ހދ. ކުޅުދުއްފުށީގައިވެސް ސިހުރުގެ ކަންތައް ބޮޑުވެ އެރަށަށް ފުލުހުން އަރާ މިދިޔަ ބުރާސްފަތި ދުވަހު ވަނީ ބޮޑު އޮޕަރޭޝަނެއް ހިންގާ ގެތަކެއް ބަލާ ފާސްކޮށްފައެވެ. އަދި 8 ގެއަކުން ސިހުރު ހަދާ ސާމާނު ނެރިގެން ފުލުހުން ވަނީ ގެންގޮސްފައެވެ.
ދާދި ފަހުން ތ. ވިލުފުއްޓާއި ރ. އަލިފުއްޓާއި ރ. މީދޫގެ އިތުރުން ހއ. ކެލާއަށްވެސް ފުލުހުން ވަނީ އަރާފައެވެ. އަދި ބައެއް ގެތައް ބަލާ ފާސްކޮށް ފޮތްތަކެއް ވަނީ ގެންގޮސްފައެވެ.
