"ނޫރުލް އަޒާން" ބަންގި މުބާރާތަކީ އުމުރުން 15 އަހަރާއި 20 އަހަރާއި ދެމެދުގެ ފަރާތްތަކަށް އަމާޒުކޮށްގެން މިނިސްޓްރީން ކުރިއަށް ގެންދިއުމަށް ހަމަޖެހިފައިވާ މުބާރާތެކެވެ. އެގޮތުން މި މުބާރާތުގައި ބައިވެރިވުމަށް ހުޅުވާލި ފުރުސަތުގައި 40 ފަރާތަކުން ބައިވެރިވެފައިވާއިރު، މުބާރާތަށް ޝަރުތު ހަމަވި 20 ކުއްޖަކު ވަނީ އޮޑިޝަންގައި ވާދަކޮށްފައެވެ. މި އޮޑިޝަންތައް ބާއްވާފައިވަނީ މިމަހުގެ 11 ވަނދުވަހުއެވެ.
މުބާރާތް ކުރިޔަށްދާނީ 10 ބައިވެރިންނާއެކުއެވެ. މުބާރާތުގެ ފައިނަލް ބުރަށް ދަތުރުކުރާނީ ފުރަތަމަ ބުރުން އެންމެ މަތިން މާކްސް ހޯދާ ހަ ބައިވެރިންނެވެ. ގަދަ ތިނެއް ހޮވާނީ ފައިނަލްގައި ވާދަކުރާ ހަ ބައިވެރިންގެ ތެރެއިންނެވެ.
"ނޫރުލް އަޒާން 1446″ ބަންގި މުބާރާތުގެ އޮޑިޝަންގެ ތެރެއިން
މި މުބާރާތުން ވަނަތަކަށް އަންނަ ބައިވެރިންނަށް އިނާމު ދިނުމަށް ހަމަޖެހިފައިވާއިރު، އަންނަ ރޯދަ މަހު މާލޭގެ ބޮޑެތި މިސްކިތްތަކުގައި ހުކުރު ނަމާދުގެ ބަންގި ގޮވުމުގެ ފުރުސަތު ދިނުމަށްވެސް ހަމަޖެހިފައިވާކަމަށްވެސް މިނިސްޓްރީން ބުނެއެވެ.
ބަންގި މުބާރާތުގެ މަގުސަދަކީ ރީތި ރާގުތަކަށް ސައްހަ މަގުން ހުނަރުވެރިކަމާއެކު ބަންގިދޭ ޒުވާނުންތަކެއް އުފެއްދުމާއި ޒުވާނުންނާއި ކުދިބޮޑު އެންމެންގެ ހިތްތަކުގައި އެކަމަށް ޝައުގުވެރިކަން އުފެއްދުން ކަމުގައި މިނިސްޓްރީން ބުނެއެވެ.
"ނޫރުލް އަޒާން 1446″ ބަންގި މުބާރާތުގެ އޮޑިޝަންގެ ފަނޑިޔާރުން
މީގެއިތުރުން ގައުމުގެ އިސްލާމީ ޝަހްސިއްޔަތު ވަރުގަދަ ކުރުމާއި. ރީތިކޮށް ބަންގިދޭ ޒުވާނުންގެ ޕޫލެއް އެކުލަވާލުމާއި، މި ފަންނުގެ ރޫހު އާލާކޮށް ދިރުވައި ކުރުއެރުވުމާއި، މިއީ ދާއިރާއެއްގެ ގޮތުގައި ފާހަގަކޮށް މި ދާއިރާގައި އުޅުއްވާ ފަރާތްތަކުގެ އަގުވަޒަންކުރުމާއި މާލެސިޓީއާއި މުޅި ރާއްޖޭގެ މުސްތަގުބަލުގެ އިސްލާމީ ޝަހްސިއްޔަތު ވަރުގަދަކުރުމީ މި މުބާރާތުގެ މުހިއްމު މަގްސަދުތައް ކަމަށް އިސްލާމިކް މިނިސްޓްރީން ފާހަގަކުރެ އެވެ.
