އުމުރުން 59 އަހަރުގައި ދުނިޔެ ދޫކުރި މެޒޯ މޯޑްގެ ފަހު ވަގުތުކޮޅުގެ މި ވީޑިއޯގައި ފެންނަނީ ސެލޫނަކަށް ގޮސް ބޯކޮށާލުމަށްފަހު ލޯ ކަޅު އައިނެއް އަޅައިގެން ވީޑިއޯއަށް ޕޯޒު ދޭ މަންޒަރެވެ. މަރްޒޫގް ކިޔައިދިން ގޮތުގައި މި ވީޑިއޯ ނަގާފައި ވަނީ އޭނާ ދުނިޔެ ދޫކުރުމުގެ ދެ ގަޑިއިރު ކުރިންނެވެ.
މިގޮތުން 1977 ވަނަ އަހަރު ކްލަބް ކޯބްރާސްއިން މިއުޒިކްގެ ދާއިރާއަށް ނުކުތް މެޒޯ މޯޑް، ދުނިޔެ ދޫކުރުމުގެ 45 މިނެޓް ކުރިން ވަނީ އޭނާގެ ރައްޓެހިންނާއެކު ކޮފީއެއްގައި ބައިވެރިވެފައެވެ. މި ވީޑިއޯގައި ފެންނަ އެ ހެދުމާއި އައިނުގައި ހުރި ފޮޓޯތަކެއް މަރްޒޫގް ވަނީ މީގެ ކުރިން ހިއްސާކޮށްފައެވެ.
"ކަމަނަ ގޯތީ އާދަނުތާ" އާއި "ވެއްޖެ ކަމަކާ ހައްޖާ ހަމައޭ" އަދި "ޖިސްމު" ފަދަ ގިނަ މަގުބޫލު ލަވަތަކެއް ކިޔައިދީފައިވާ މެޒޯ މޯޑަކީ ދިވެހި މިއުޒިކްގެ ދާއިރާގައި ފާހަގަކޮށްލެވޭ އަޑެއްގެ ވެރިއެކެވެ. އޭނާގެ އަޑު މަގުބޫލުވެގެން ދިޔަ އެހެން ލަވަތަކުގެ ތެރޭގައި "އުޑުން ތަރިތައް" އާއި "ވިސްނާ ވިސްނާ" އަދި "ދާނެހޭ ތިހަނދާން ފިލާ" ހިމެނެއެވެ.
