ސަރުކާރުން ޓެކްސީ ލައިން ތައާރަފުކޮށް އެކަން ހިންގުމަށް އެމްޓީސީސީއާ ހަވާލުކުރީ މިމަހުގެ 12 ވަނަ ދުވަހުއެވެ.
މި ހިދުމަތަޢް ބޭނުންވާ އިލެކްޓްރިކް ވެހިކަލްތައް (އީވީ) ރާއްޖެ ގެނެސޭދެނެ ބަޔަކު އެކަމަށް އެދި ކުރިމަތިލުމަށް ޓްރާންސްޕޯޓް މިނިސްޓްރީން ވަނީ ހުޅުވާލާފައެވެ. އެ މިނިސްޓްރީން މި މަސައްކަތް ކޮށްދޭން އެދޭ ފަރާތްތަކުން ފުރަތަމަ ކާރުތައް އަންނަ ޖުލައި މަސް ނިމުމުގެ ކުރިން ރާއްޖެ ގެނެސްދޭނެކަމަށެވެ. އަދި ކާރުތައް ގެންނަން ޖެހޭނީ ޗާޖިން ސްޓޭޝަންތަކާއި އެކުކަމަށްވެސް ޓްރާންސްޕޯޓް މިނިސްޓްރީން ބުނެއެވެ.
މީގެއިތުރުން މިކަމަށް ކުރިމަތިލާ ފަރާތްތަތަކީ އެތަކެތި އުފައްދާ ނުވަތަ ފޯރުކޮށްދޭން ވެހިކަލް އުފެއްދުމުގެ ބާރު އޮތް ފަރާތަކަށް ވާންޖެހޭނެކަމަށް މިނިސްޓްރީން ބުނެއެވެ. އަދި ގެންނަ ކާރުތަކަށް މަފުވެގެން 3 އަހަރުގެ ވޮރެންޓީއެއް ދޭންޖެހޭނެކަމަށްވެސް ޓްރާންސްޕޯޓް މިނިސްޓްރީން ބުނެއެވެ. މި ކާރުތައް ސަޕްލައި ކޮށްދޭން ބޭނުންވާ ފަރާތަކުން އެކަމަށް އެދުމަށް އަންނަމަހުގެ 9 ވަނަދުވަހާއި ހަމައަށް ފުރުސަތު ހުޅުވާލާފައިވާކަމަށް ޓްރާންސްޕޯޓް މިނިސްޓްރީން ބުނެއެވެ.
ތިމާވެއްޓާ ރައްޓެހި ޓެކްސީ ލައިނެއް ތައާރަފުކުރުމަށް ސަރުކާރުން ފަށާފައިވާ މި މަޝްރޫއުގެ ދަށުން 20 އާއި 25 ޕަސަންޓް ޓެކްސީތަކަކީ އިލެކްޓްރޯނިކް ވެހިކަލްތަކަށް ހެދުމަށް ވަނީ ނިންމާފައެވެ.
މި ޓެކްސީ ލައިންގެ ހިދުމަތް އެމްޓީސީސީ އިން ފަށާނީ ތިން ފޭހަކަށް ބަހާލައިގެންނެވެ. ފުރަތަމަ ފިޔަވަހީގައި މި އަހަރުގެ ތެރޭގައި މާލެ، ހުޅުމާލެ އަދި ވީއައިއޭގައި ހިދުމަތް ފަށާނެ އެވެ. ލިނގިއްޔާއި ތިލަފުށީގައި ހިދުމަތް ފަށާނީ އަންނަ އަހަރާއި 2027 ގައެވެ. އެނެމްފަހުން މި ހިދުމަތް ފަށަން ނިންމާފައިވާ ރަސްމާލޭ، ގިރާވަރު ފަޅު، އައްޑޫ، ފުވައްމުލަކު އަދި ކުޅުދުއްފުށީ ސިޓިގައި ހިދުމަތް ފެށުމަށް ނިންމާފައިވަނީ 2029ގައެވެ.
ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ މި ހިދުމަތް ފެށުމުގެ މައިގަނޑު މަގުސަދަކީ މާލޭގައި ޓެކްސީގެ ހިދުމަތް އިތުރަށް ހަރުދަނާކޮށް، ރައްޔިތުންނަށް ފަސޭހަ އަގެއްގައި ހިދުމަތް ފޯރުކޮށްދިނުމަށްކަމަށެވެ. އަދި މި ހިދުމަތުގައި 50 ޕަސަންޓް ޑްރައިވަރުންނަކީ ދާއިމީ މުވައްޒަފުންގެ ގޮތުގައި ތިބޭނެ މީހުން ކަމަށްވެސް މިނިސްޓަރު ވަނީ ވިދާޅުވެފައެވެ.
ސަރުކާރުގެ ޓެކްސީ ލައިނުގެ ހިދުމަތް މިހާރު ހިދުމަތްދޭ އަގަށްވުރެ ކުޑަ އަގެއްގައި ދިނުމަށް ވަނީ ނިންމާފަ އެވެ. އަދި މި ހިދުމަތް ފެށުމުން މިހާރު އަމިއްލަ ގޮތުން ހިދުމަތްދޭ ފަރާތްތަކަށް އެއްވެސް ދަތިކަމެއް ނުވާނެކަމުގެ ޔަގީންކަން ސަރުކާރުން ދީފައިވެއެވެ. އެހެންނަމަވެސް ޓެކްސީ ޑްރައިވަރުން ވަނީ ސަރުކާރުން ޓެކްސީ ހިދުމަތް ފަށާތީ އެކަމުގެ ކަންބޮޑުވުން ފާޅުކޮށްފައެވެ. އެގޮތުން މިކަމުގެ ސަބަބުން 10000 ވުރެ ގިނަ މީހުންނަށް އެކަމުގެ ނޭދެވޭ އަސަރުކުރާނެކަމަށް ޓެކްސީ ޑްރައިވަރުން ވަނީ ބުނެފައެވެ.
