މަގުބޫލު ދިވެހި ފިލްމު "ލޫދިފާ" ގެ ޕްރޮޑަކްޝަން ޓީމީހުގެ އެންމެ މުހިންމު ތިން ބައިވެރިންކަމަވާ، ޕްރޮޑިއުސަރު، ހަސަން ނޫރައްދީން (ނޫރު) އާއި، ރާއްޖޭގެ ފިލްމު އިންޑަސްޓްރީ ބަދަލުކޮށްލި ޑައިރެކްޓަރު މޫމިން ފުވާދު، އަދި އިސްމާއިލް ރަޝީދު (ކޮޕީ އިއްސެ) ތައްޔާރުކުރަމުން އަންނަ "އަބަދަށް" ފިލްމުގެ ޕޯސްޓަރާއި، ޓީޒާ އާންމުކޮށްފިއެވެ.

Advertisement
އަންނަ އޭޕްރީލް މަހުގެ 28 ވަނަ ދުވަހު އޮލިމްޕަސް ސްކީނުގައި ރިލީޒްކުރާ މި ފިލްމުގެ، ޕޯސްޓަރާއި ޓީޒާ ނެރުނީ ބުދަ ދުވަހުގެ ރޭ އޮލިމްޕަހުގައި ބޭއްވި ހާއްސަ ހަފްލާއެއްގައެވެ.
މި ފިލްމުގެ ޕްރޮޑަކްޝަން ޑިޒައިނަރު ކޮޕީ އިއްސެ ސީއެންއެމްއާ ވާހަކަ ދައްކަމުން ބުނީ، މޫމިން ފުވާދުގެ ފިލްމެއް ނުނިކުންނަތާ ދުވަސްކޮޅެއް ވެއްޖެކަމަށާއި، އެހެންކަމުން އަނެއްކާވެސް މޫމިންގެ ފިލްމެއް ބަލައިލުމުގެ ފުރުސަތު މިހާރު ލިބިފައިވާކަމަށެވެ.
އަބަދައްގެ ޕޯސްޓަރު ރިލީޒްކުރުން: ފޮޓޯ ސީއެންއެމް
"ވަރަށް ބުރަކޮށް މަސައްކަތްކޮށްގެން މި ފިލްމު މި ނިންމަނީ. ހަމަ ޔަގީނުންވެސް ބެލުންތެރިންނަށް ފުރިހަމަ ޒަމާނަށް ފެތޭ މުޖުތަމައު ގަބޫލުކުރާ ފިލްމަކަށް ވާނެ،" ކަމަށް ބެސް ކޮޕީ އިއްސެ ބުންޏެވެ.
ފިލްމުގެ ޑައިރެކްޓަރު އަދި ފިލްމުގެ ސްރިޕްޓު ލިޔުނު މޫނިން ފުވާދު ބުނީ އަބަދުވެސް ފިލްމު ހަދަނީ ސޯޝަލް މައްސަލަތަކަށް ކަމަށާއި، މި ފަހަރު ވެސް މިއީ އެކަހަލަ ކަމަކަމަށް ހަދާފައިވާ ފިލްމެއްކަމަށެވެ.
ފިލްމުން ދައްކުވައިދޭނީ "އިޖްތިމާއީ މައްސަލައެއް ބޮޑުވަމުން ބޮޑުވަމުން ގޮސް އެކްސްޓްރީމަށް ގޮސްދާނެކަން. މައްސަލައެއްގެ ފެށުން ވަރަށް ކުޑަވެދާނެ އެކަމަކު އޭތި ގޮސް ނިމިގެންދާއިރު އޭތި މި އެކްސްޓްރީމަށް ދިޔައީމަ މި އޮންނަނީ ބައެއްގެ ދިރިއުޅުން އޭގެ ސަބަބުން ހަލާކުވެ، އެތައް ބަޔަކަކު އަބަދަށް ހިތާމައަކަށް ނުވަތަ ނިމުމެއް ނެތް ހިތާމައަކަށް ހިނގައިދާނެކަން،" ކަމަށް ވެސް މޫމިން ބުންޏެވެ.
މި ފިލްމުގައި ވަރަށް ސަޅި ރޯލަކުން މަޝްހޫރު ފިލްމީ ތަރި ޔޫސުފް ޝަފީއު (ޔޫއްޕެ) ފެންނައިރު، ފިލްމުން ވާޝިޔާ، ޝާރިފް، ސޫޒަން ފަދަ މަގުބޫލު ތަރިން ވެސް ފެންނާނެއެވެ. އަދި ކޮޕީ އިއްސެ ވެސް ހާއްސަ ރޯލަކުން މި ފިލްމުގައި ފެނެއެވެ.