މިދިޔަ އަހަރު ސެޕްޓެމްބަރު މަހު ހިރިމަރަދޫ ރައްޔިތުން އެހެން ރަށަކަށް ބަދަލުކޮށްދިނުމަށް އެދުމާ ގުޅިގެން، ސަރުކާރުން މިހާރު ވަނީ އެ ރަށުގެ ރައްޔިތުން ހަނިމާދޫއަށް ބަދަލުކުރުމަށް ނިންމާފައެވެ. މިނިސްޓަރު އާދަމް ޝަރީފް އުމަރު ހަނިމާދޫއަށް ކުރެއްވި ދަތުރުފުޅުގައި ދެ ރަށުގެ ކައުންސިލާއި ރައްޔިތުންނާ ބައްދަލުކުރައްވައި މަޝްވަރާކުރެއްވިއެވެ.
ހިރިމަރަދޫގައި މުޅި އާބާދީ 500 އެއްހާ މީހުން ތިބިއިރު، ގިނަ ބަޔަކު ދިރިއުޅެނީ ރަށުން ބޭރުގައެވެ. ރަށުގައި އާބާދީ ކުޑަވުމުގެ ސަބަބުން ރަށަށް އެކަށީގެންވާ ތަރައްގީ ނުލިބޭކަމަށް ރައްޔިތުން ފާހަގަކުރެއެވެ. ރަށުގައި ޒުވާނުންގެ އަދަދަށްވުރެ ދޮށީ އުމުރުގެ މީހުންގެ އަދަދު ދަނީ އިތުރުވަމުންނެވެ. ރަށުގެ އެކި ކަންކަމުގައި ބިދޭސީންނަށް ބަރޯސާވާންޖެހޭ ހާލަތަށް ރަށުގެ ކަންކަން ގޮސްފައިވުމަކީ ރަށުގެ ރައްޔިތުން ކަންބޮޑުވާ ކަމެކެވެ.
މިނިސްޓަރު ހަނިމާދޫއަށް ކުރެއްވި ދަތުރުފުޅުގެ މައިގަނޑު މަގްސަދަކީ ހިރިމަރަދޫ ރައްޔިތުން އެހެން ރަށަކަށް ބަދަލުކުރާއިރު، އެ ރަށުގެ ރައްޔިތުންގެ ވިސްނުމާއި ހިޔާލު ސާފުކޮށް ދެނެގަތުމެވެ. ހަނިމާދޫ ކައުންސިލްގެ މެންބަރުންނާއެކު ކުރެވުނު މަޝްވަރާގައި، ހަނިމާދޫގައި ރައްޔިތުންނަށް ލިބެންޖެހޭ އަސާސީ ހިދުމަތްތައް އިތުރަށް ތަރައްގީ ކުރުމާ ބެހޭގޮތުން ވަނީ ވާހަކަދެކެވިފައެވެ.
ހިރިމަރަދޫ ރައްޔިތުން އެދެނީ ވީހާވެސް އަވަހަކަށް ރަށުގެ އާބާދީ ބަދަލުކޮށްދިނުމަށެވެ. މިގޮތަށް ބަދަލުކުރުމުން ރަށުގެ ރައްޔިތުންނަށް އެކި ގޮތްގޮތުން ކުރިއެރުންތައް ލިބިގެންދާނެކަމަށް އެ ރަށުގެ ރައްޔިތުން ދެކެއެވެ.
