މި ދުވަސްވަރަކީ ވިއްސާރަ ދުވަސްވަރަކަށް ވުމާއެކު އެއްވެސް ސަބަބަކާހުރެ ކުނި ނުނެގި ހުރިނަމަ ނުވަތަ ހިދުމަތް ނުލިބިއްޖެނަމަ، އެކަން ވެމްކޯއަށް އަންގައިދިނުން މުހިންމުކަމަށް ކުންފުނިން ބުނެފައިވެއެވެ.
މިދުވަސްވަރު މޫސުން ގޯސްވެފައިވާތީ އުކާލާ ކުނި މަގުމައްޗަށް ނުވަތަ އާންމު ސަރަހައްދުތަކަށް ނުނެރުމަށް ވެސް ވެމްކޯއިން އެދިފައިވެއެވެ. ހަމައެއާއެކު، މިހާރު ރޯދަ މަސް ކަމަށްވާތީ، ކުނި ނަގާ ގަޑިތަކަށްވެސް ވަނީ ބަދަލުތަކެއް ގެނެސްފައެވެ. އެގޮތުން މާލޭގައި ރޭގަނޑު 8:30 އިން ފެށިގެން ދަންވަރު 2:30 އަށް، ހުޅުމާލޭގައި ރޭގަނޑު 9:00 އިން ދަންވަރު 1:00 އަށް، އަދި ވިލިމާލޭގައި ރޭގަނޑު 9:30 އިން ދަންވަރު 1:30 އަށް ކުނި ނަގާނެކަމަށް ވެމްކޯއިން މަޢުލޫމާތު ދީފައިވެއެވެ.
ކުނި ނެރުމުގައި ސަމާލުކަންދޭންޖެހޭ ކަންތައްތަކާ ގުޅޭގޮތުން ވެމްކޯއިން ވަނީ އިތުރު އިރުޝާދުތަކެއް ވެސް ދީފައެވެ. ބިއްލޫރި ނުވަތަ ތޫނު އެއްޗެހި އުކާލާނަމަ، އޭގެ ސަބަބުން ވެށިފާރަވެރިންނަށް ގެއްލުން ނުވާނެހެން ރަނގަޅަށް ބަންދުކޮށްފައި ވަކިން ބެހެއްޓުމަށް ވެމްކޯއިން އިލްތިމާސްކޮށްފައިވެއެވެ.
ރޯދަ މަހު މާލޭ ސަރަހައްދުގައި ކުނީގެ ގޮތުގައި އުކާލާތަކެތި އިތުރުވާތީ، އީޕީއޭއިން ވެސް ވަނީ މަގުމައްޗާއި ދުވާރުމަތީގައި ކުނި އިތުރުނުވާނެ ގޮތަށް ޢަމަލުކުރުމަށް އިރުޝާދު ދީފައެވެ. މި ދުވަސްވަރު ވަކިން ހާއްސަކޮށް މާލޭގެ ސާފުތާހިރުކަން ހިފެހެއްޓުމަށް ރައްޔިތުން އެއްބާރުލުން ދިނުން މުހިންމުކަމަށް ވެމްކޯއިން ބުނެފައިވެއެވެ.
