އެޓަރނީ ޖެނެރަލްގެ އޮފީހުން ބުނީ ދިވެހިރާއްޖެއިން ހުށަހެޅި ބަޔާނުގައި އިންޓަނޭޝަނަލް ހިއުމަނިޓޭރިއަން ލޯ އާއި، އިންސާނީ ހައްގުތަކާބެހޭ ބައިނަލްއަޤްވާމީ ބައެއް މުޢާހަދާތަކުގެ ދަށުން އިސްރާއީލްގެ ޒިންމާތައް ފާހަގަކޮށްފައިވާ ކަމަށެވެ. އަދި މީގެ އިތުރުން ފަލަސްތީނުގެ ރައްޔިތުންނަށް މެދުކެނޑުމެއްނެތި ފެނުގެ ވަސީލަތްތައް ފޯރުކޮށްދިނުމުގެ ޒިންމާއަށް ވެސް އަލިއަޅުވާލާފައިވާ ކަމަށް އެޓަރނީ ޖެނެރަލްގެ އޮފީހުން ހާމަކޮށްފައިވެއެވެ.
އައިސީޖޭ އިން ލަފައަކަށް އެދޭ މި މައްސަލައަކީ، އދ އާއި، އެހެނިހެން ބައިނަލްއަގްވާމީ ޖަމްއއްޔާތަކާއި، އެހެން ޤައުމުތަކުން ފަލަސްތީނުގެ އާންމު ރައްޔިތުންނަށް ފޯރުކޮށްދެމުންދާ އިންސާނީ އެހީތެރިކަމަށް ހުރަސް އަޅައި، ފަލަސްތީނުގެ ރެފިއުޖީންނަށް އިންސާނީ އެހީތެރިކަން ފޯރުކޮށްދޭ އދ ގެ ޔުނައިޓެޑް ނޭޝަންސް ރިލީފް އެންޑް ވަރކްސް އޭޖެންސީ ފޮރ ޕަލަސްޓައިން ރެފިއުޖީސް އިން ދަ ނިއަރ އީސްޓް (ޔޫ.އެން.އާރު.ޑަބްލިއު.އޭ.) ގެ މަސައްކަތްތައް ހުއްޓުވާލުމަށް އިސްރާއީލުން ނިންމުމާ ގުޅިގެން ހުށަހަޅާފައިވާ މައްސަލައެކެވެ. މިއީ 19 ޑިސެންބަރު 2023 ގައި އދ ގެ ޢާންމު މަޖިލީހުގެ ގަރާރަކުން ފާސްކޮށްގެން ހުށަހަޅާފައިވާ މައްސަލައެކެވެ.
ބަޔާނުގައި، ދިވެހިރާއްޖެއިން ފާހަގަކޮށްފައިވަނީ އދ ގެ މެންބަރެއްގެ ހައިސިއްޔަތުން އިސްރާއީލްގެ މައްޗަށް ޔޫއެންއާރުޑަބްލިއު.އޭ ގެ މަސައްކަތްތަކާ ގުޅޭގޮތުން އޮތް ޒިންމާ ތަފްސީލުކޮށް، އެ ޖަމްޢިއްޔާ ރޫޅާލުން މަނާކުރާ ބައިނަލްއަޤްވާމީ ޤާނޫނީ އުސޫލުތަކުގެ މައްޗަށް ކަމަށް އެޓަރނީ ޖެނެރަލްގެ އޮފީހުން ބުނެއެވެ.
ފަލަސްތީނާއި އިސްރާއީލްގެ މައްސަލައަށް އޮތް ހަމަ އެކަނި ދެމެހެއްޓެނިވި ހައްލަކީ، 1967 ވަނަ އަހަރުގެ ކުރިން އޮތް ސަރަހައްދީ އިންތަކުގެ މައްޗަށް ބިނާކޮށް، އިރުމަތީ ޤުދުސް ވެރިރަށެއްގެ ގޮތުގައި ކަނޑައަޅައި، މިނިވަން، މުސްތަޤިއްލު އަދި އަމިއްލަ ސިޔާދަތީ ބާރު ހިނގާ ފަލަސްތީނުގެ ދައުލަތެއް ޤާއިމުކުރުންކަމަށް ސަރުކާރުން ބުނެއެވެ. މި ހައްލު ހޯދުމަށް ފަލަސްތީނުގެ ރައްޔިތުން ކުރާ މަސައްކަތަށް އެއްބާރުލުން ދިނުމުގައި ދިވެހި ދައުލަތް ސާބިތުކަމާއެކު ދެމިއޮންނާނެ ކަމުގެ ޔަޤީންކަންވެސް ސަރުކާރުން ދީފައިވެއެވެ.
