ލިބުނު މައުމާތަކާ ގުޅިގެން ފުލުހުން ކޯޓު އަމުރެއްގެ ދަށުން މިދިޔަ ޖެނުއަރީ 30 ވަނަ ދުވަހުގެ ރޭ ބަލައި ފާސްކުރި އެޕާޓްމަންޓުގެ ތެރެއިން 103 ކާޑްބޯޑް ފޮށިތަކެއް ފެނިފައިވާ ކަމަށާއި އޭގެ ތެރޭގައި 49،000 ސިނގިރޭޓް ފޮށި ހިމެނޭ ކަމަށް ފުލުހުން މިއަދު ހާމަކުރިއެވެ.
ފުލުހުންގެ މައުލޫމާތުން އެނގޭ ގޮތުގައި ސިނގިރޭޓް އުފެއްދުމުގެ މަސައްކަތް ކުރީ "ރޭޑިއަސް" ނަމަކަށް ކިޔާ ކުންފުންޏަކުންނެވެ. އެ ތަނަކީ އެ ކުންފުނިން ކުއްޔަށް ހިފާފައިވާ ތަނެއް ކަމަށްވެސް ފުލުހުން ބުނެފައިވެއެވެ.
ދުންފަތް ކޮންޓްރޯލް ކުރުމާ ބެހޭ ގާނޫނުގެ ދަށުން ދިވެހިރާއްޖޭގައި ދުންފަތް އުފެއްދުމަކީ މަނާކަމެކެވެ. އެހެންނަމަވެސް ދުންފަތުގެ ބައެއް ބާވަތްތައް ރާއްޖެއަށް އެތެރެކުރުމުގެ ހުއްދަ އޮވެއެވެ. މި ގާނޫނުގައި "ދުންފަތުގެ ބާވަތްތައް" ކަމަށް ބަޔާންކޮށްފައިވަނީ ދުންފަތް، ދުންފަތުގެ ތަނޑި، ނިކޮޓިން ނުވަތަ މި ތަކެތި ހިމަނައިގެން ތައްޔާރުކޮށްފައި ހުންނަ ތަކެތި ކަމަށެވެ.
