ކަސްޓަމްސް އިން އާއްމުކުރި ހިސާބުތައް ދައްކާގޮތުން މދިޔަ ޖެނުއަރީމަހު އާމްދަނީގެ ގޮތުގައި ލިބުނީ 287 މިލިއަން ރުފިޔާއެވެ. މީ އޭގެ ކުރީ މަހާ އަޅާބަލާއިރު 14 މިލިއަން ރުފިޔާގެ ދަށްވުމެކެވެ. މިދިޔަ އަހަރުގެ ޑިސެމްބަރުމަހު ކަސްޓަމަށް ވަނީ 301 މިލިއަން ރުފިޔާގެ އާމްދަނީއެއް ލިބިފައެވެ.
ކަސްޓަމްސްގެ ހިސާބުތައް ދައްކާ ގޮތުން މިދިޔަ މަހު 5.2 ބިލިއަން ރުފިޔާގެ މުދާ ރާއްޖެ އެތެރެކޮށްފައިވެއެވެ. ރާއްޖެއިން ބޭރުކުރު މުދަލުގެ އަގަކީ 144 މިލިއަން ރުފިޔާއެވެ. މިދިޔަ ޑިސެމްބަރުގައި މިއަދަދުތައް ހުރީ މަތީގައެވެ. ޑިސެމްބަރުގައި 5.8 ބިލިއަން ރުފިޔާގެ މުދާ އިމްޕޯޓުކުރިއިރު، އެކްސްޕޯޓުކުރީ 116 މިލިއަން ރުފިޔާގެ މުދަލެވެ.
މި ހިސާބުތަކަށް ބަލާއިރު ޖެނުއަރީމަހުގެ އިމްޕޯޓުން 600 މިލިއަން ރުފިޔާ ވަނީ ދަށްވެފައެވެ. އަދި އެކްސްޕޯޓުވަނީ 28 މިލިއަން ރުފިޔާއިން އިތުރުވެފައެވެ.
ޖެނުއަރީމަހު ރާއްޖެއަށް އެންމެ ގިނައިން މުދާ އެތެރެކޮށްފައިވަނީ އިންޑިއާ، ޗައިނާ، ޔޫއޭއީ، މެލޭޝިއާ އަދި ސިންގަޕޫރުންނެވެ. އެންމެ ގިނައިން މުދާ އެކްސްޕޯޓްކޮށްފައި ވަނީ ތައިލެންޑް، އިނގިރޭސިވިލާތް، ބަންގްލަދޭޝް ވިއެޓްނާމް އަދި އިންޑިއާކަމަށް ކަސްޓަމުން ބުނެއެވެ.
