އަންނަ ރޯދަމަހު ކޮންމެ ގޭބިސީއެއްގެ ކަރަންޓް ބިލުން މަދުވެގެން 10 އިންސައްތަ ޑިސްކައުންޓް ލިބޭނެކަމަށް ސްޓެލްކޯއިން ވަނީ ބުނެފައެވެ. ރޯދަމަހުގެ ބިލްތަކަށް ޑިސްކައުންޓު ދޭނީ ރޯދަމަހު ބޭނުންކޮށްފައިވާ ކަރަންޓަށް އެކަނި ކަމަށާއި އެގޮތުން އެމަހަށް ވަކިން ކަރަންޓް ރީޑިން ނަގާ ވަކި ބިލެއް ތައްޔާރުކުރާނެކަމަށް ސްޓެލްކޯއިން ވަނީ ބުނެފައެވެ. އަދި ފެބްރުއަރީމަހުގެ ބިލް ފޮނުވުމަށް އެމަހުގެ ރީޑިން ނެގުމަށް ސްޓެލްކޯއިން ވަނީ އާއްމުކޮށް އިއުލާންކޮށްގެން ހާއްސަ ހަރަކާތެއްވެސް ހިންގާފައެވެ.
ދެ ބިލެއް ދާދި ކާއިރީގައި އައުމުން ބައެއް ފަަރާތްތަކުން ދައްކަމުން ގެންދާ ވާހަކަތަޢް ޖަވާބުދެއްވާ ސްޓެލްކޯގެ އެމްޑީ ހުސެއިން ފަހުމީ ވިދާޅުވީ ސްޓެލްކޯއަކީ 75 އަހަރުގެ ގައުމީ ހިދުމަތުގެ ރެކޯޑް އޮތް ކުންފުންޏެއްކަމަށާއި އެ ކުންފުނިން އެއްވެސް ކަމެއް ރައްޔިތުންނަށް އޮޅުވާލުމުގެ ނިޔަތުގައި ނުކުރާނެ ކަމުގެ ފުރިހަމަ ޔަގީންއަރުވާކަމަށެވެ. ފަހުމީ ވިދާޅުވީ ރޯދަމަހުގެ ބިލް ވަކިކުރަން ނިންމާ ފެބްރުއަރީމަހުގެ ބިލް ފޮނުވީ ކުންފުނީގެ ހިދުމަތް ހޯދާ ކަސްޓަމަރުންގެ ފައިދާއަށް ނިންމި ނިންމުމެއްކަމަށެވެ.
ފަހުމީ ވިދާޅުވީ ކަސްޓަމަރުންނަށް ކުރިމަތިވެދާނެ މާލީ ދަތިކަން ފިލުވުމަށްޓަކައި ޖޫރިމަނާ ނާރާގޮތަށް މި ބިލް ދެއްކުމަށް ވަނީ 30 ދުވަހުގެ މުހުލަތެއްވެސް ދީފައިކަމަށެވެ. މީގެއިތުރުން ފެބްރުއަރީގެ މި ބިލް ފޮނުވުމުގެ މަގުސަދު ތަކުގެ ތެރޭގައި ރޯދަމަހުގެ ފުރަތަމަ ދުވަހުން ފެށިގެން ރޯދަމަސް ނިމެންދެން އެއް ބިލެެއްގެ ގޮތުގައި މުޅި ރޯދަ މަހުގެ ޔޫސޭޖަށް ބިލެއް ތައްޔާރުކޮށް، ސަރުކާރުން ދޭން ނިންމާފައިވާ ޑިސްކައުންޓް އެ ބިލްގައި ހިމެނުންވެސް ހިމެނޭކަން ފަހުމީ ވަނީ ފާހަގަކުރައްވާފައެވެ.
މި ރޯދަމަހުން ފެށިގެން ބިލު ކުރާ ގޮތަށްވެސް ބަދަލުތަކެއް ގެނަން ސްޓެލްކޯއިން ވަނީ ނިންމާފައެވެ. އެގޮތުން ރޯދަ މަހުން ފެށިގެން ރީޑިން ނަގަން ފަށާނީ މަހުގެ ފަހުކޮޅުގައިކަމަށް އެ ކުންފުނިން ވަނީ މީގެ ކުރިން ބުނެފައެވެ. މި ބަދަލު ގެންނަނީ މުސާރަ ލިބޭ ދުވަސްކޮޅަށް ބިލު ދައްކަން ފަސޭހަކުރުމަށްކަމަށާއި އޭރުން ރީޑިން ނަގާ ދުވަހުގެ އަނެއް ދުވަހު ކަރަންޓު ބިލު ލިބޭނެކަންވެސް ސްޓެލްކޯއިން ވަނީ ބުނެފައެވެ.
މި ރޯދަމަހުވެސް ކަރަންޓާއި ފެން ބިލުން ޑިސްކައުންޓް ދިނުމަށް ސަރުކާރުން ވަނީ ނިންމާފައެވެ. އެގޮތުން ފެނާއި ކަރަންޓުން 10 އިންސައްތަ ޑިސްކައުންޓް ދޭނެކަމަށް ސްޓެލްކޯއާއި އެމްޑަބްލިޔުއެސްސީން ވަނީ ބުނެފައެވެ.
