ޕީއެންސީގެ މެންބަރު މަމްދޫހު ވިދާޅުވީ ނޫހެއްގައި "ރައީސް މުއިއްޒުގެ ހުއްދަ ނެތި މިނިސްޓަރުންނާއި ސަރުކާރު ކުންފުނިތަކުގެ ވެރިން މަޖިލީހަށް ހާޒިރު ކުރުން މަނާކޮށްފި" މި ސުރުހީގެ ދަށުން ޝާއިއުކޮށްފައިވާ ހަބަރަކީ "ކަނޑައެޅިގެން ދޮގު ހަބަރެއް" ކަމަށެވެ. މަމްދޫހު އެކްސްގައި ކުރެއްވި ޕޯސްޓެއްގައި ބުނީ މިފަދަ އެއްވެސް އެންގުމެއް ރައީސް މުއިއްޒު އަދި ޕީޖީ ލީޑަރު ފަލާހުވެސް އަންގާފައި ނުވާކަމަށެވެ.
މަޖިލީހުގެ ކަންކަން ނިންމަމުންދަނީ ފުރިހަމަ މިނިވަންކަމާއެކު، މަޖިލީހުގެ އިންފާރު ތެރޭގައި، ރައްޔިތުންގެ މަންދޫބުން ކުޑަވެސް ނުފޫޒެއް ނެތިކަމަށްވެސް މަމްދޫހު ވިދާޅުވިއެވެ.
މަޖިލިސް ކުރިއަށް އޮތްތަނުގައިވެސް ދެމިއޮންނާނީ "ދިވެހީންގެ ރާއްޖެ" މެނިފެސްޓޯ ފުރިހަމަ ގޮތުގައި ތަންފީޒުކޮށް، ގައުމާއި ރައްޔިތުންގެ ހެވާއި ލާބައަށް މަސައްކަތްކުރުމުގައި ކަމަށް މަމްދޫހު ފާހަގަކުރެއްވިއެވެ. މީގެ އިތުރުން، ސަރުކާރަށް ފުރިހަމައަށް އެއްބާރުލުން ދިނުމާއެކު، ސަރުކާރުގެ ކަންކަމަށް ފާރަވެރިވެ ޖަވާބުދާރީ ކުރުވައި، ކަންކަން ދިވެހިންގެ އެދުމުގެ މަތިން އިސްލާހުކުރަމުންދާ މަޖިލީހެއްގެ ގޮތުގައި މަޖިލިސް ދެމިއޮންނާނެކަމަށް މަމްދޫހު ވިދާޅުވިއެވެ.
