
ކަދުރުގެ ބާވަތަކުން ރޯދަވީއްލެވުމާއި، ހާރުދަމުގެ ވަގުތުގައި ކަދުރުގެ ބާވަތަކުން ހާރު ފަރިއްކުޅުއްވުމާއި، މިކަންކަމަކީ މާތް ނަބިއްޔާގެ ސުންނަތުގައި ހިމެނިފައި ހުރި ކަންކަމެވެ. ރޯދަ މަހުގެ ރޯދަ ކަދުރުން ވީއްލުމަކީ މުސްލިމުންގެ މައްޗަށް ސުންނަތެކެވެ. އެހެންކަމުން ކަދުރުގެ މުހިންމުކަމާއި އުފާވެރިކަން މުސްލިމުންނަށް ވަކީން ހާއްސަ އެވެ.
ކަދުރުން ރޯދަ ވީއްލުމަކީ މުސްލިމުންގެ މާތް ރަސޫލާގެ ސުންނަތެއް ކަމަށްވީއިރު ކަދުރު ކެއުމުން ހަށިގަނޑަށް ލިބޭ ފައިދާތައް އެނގޭހެއްޔެވެ؟
ގިނަ ބައެއްގެ މެދުގައި އެންމެ މަގުބޫލު އެއް މޭވާ ކަމަށްވާ ކަދުރުން ސިއްހަތަށް ކުރާ ފައިދާ ތަކުގެ ތެރޭގައި ސިކުނޑީގެ ދުޅަހެޔޮކަމާއި ކެންސަރު ފަދަ ބަލިތަކާއި އެހެނިހެން ބަލިތަކުން ދިފާއުކޮށްދެ އެވެ. އަދި ހަށިގަނޑުގެ ހަޖަމުގެ ނިޒާމާއި ހިތުގެ ދުޅަހެޔޮކަން ދަމަހައްޓައިދެ އެވެ. އެގޮތުން މާ ބޮޑަށް ބަނޑު ހަރުވެއްޖެ ނަމަ ގާތްގަނޑަކަށް 8-10 ގަޑިއިރު ވަންދެން ފެނުގައި ކަދުރު ފޯކުރުމަށް ފަހު ކިރު ތައްޓަކަށް ގިރައިގެން ބުއިމުން ރަނގަޅުވެދާނެ އެވެ.
ކަށީގެ މައްސަލަތައް ޖެހޭ މީހުނަށް އެންމެ ބޮޑަށް ބޭނުންވާ މިނަރަލްސް ކަދުރުގައި ހިމެނެ އެވެ. ކަށި ފީވާން މެދުވެރިވާ ސިއްހީ މައްސަލަ ކަމަށްވާ އޮސްޓިއޮޕޮރޮސިސް ޖެހިފައިވާ މީހުން ގިނަގިނައިން ކަދުރު ކާން ބައެއް ޑޮކްޓަރުން ލަފާ ދެ އެވެ. ކަދުރުން ކައްޓަށް ފައިދާވަނީ އެއިން ލިބޭ ސެލީނިއަމް، މެނަގްނީސް، ކޮޕާ، އަދި މެގްނީޒިއަމް މާއްދާތަކުގެ ސަބަބުންނެވެ.
ކަދުރަކީ މުސްލިމު މުޖުތަމަޢުގައި އެ މޭވާއަކަށް ނުހަނު ގަދަރަކާއި ލޯތްބެއް ދެވިފައިވާ މޭވާއެއް
މުސްލިމު މުޖުތަމައުގައި އެ މޭވާއަކަށް ނުހަނު ގަދަރަކާއި ލޯތްބެއް ދެވިފައިވާ ކަދުރުގައި ހިމެނޭ މާއްދާތައް ކަމަށްވާ އަޔަން، މެގްނީޒިއަމް، މެންގަނީޒް، ޒިންކް، ކޮޕާ، ފޮލިކް އެސިޑް، ޕެންޓޮތެނިކް އެސިޑް އަދި ނިއަސިންއިން ލެއަށް ގިނަ ފައިދާތަކެއް ކޮށްދެ އެވެ. ލޭގެ ދައުރުވުމާ، ލޭ ސެލްތަކުން އޮކްސީޖަން ނަގައިގަންނަ ވަރު އިތުރުކޮށްދެ އެވެ.
ހިތުގެ މައްސަލަ ހުންނަ މީހުން ކޮންމެ ހަފުތާއަކު ދެ ފަހަރު ފެނުގައި ފޯކޮށްފައި ހުންނަ ކަދުރު ކާން ސިއްހީ މާހިރުން ލަފާދެ އެވެ. ލޭ ހޮޅިތައް ވަރުގަދަ ކޮށްދީ ލޭގެ ޕްރެޝަރު ވެސް ހަމައަކަށް އަޅުވާލަދެ އެވެ. ގަޔަށް ބޭނުން ނުވާ ބާވަތުގެ ކޮލެސްޓްރޯލް މަދުވެ، ހިތުގެ ވިންދު ވަރުގަދަވެ އެވެ.
ބައެއް ދިރާސާތަކުން ދައްކާ ގޮތުގައި ކަދުރު ކެއުމުން ހަށިގަނޑަށް އޮކްސިޓޯސިން އިން ކުރާ ކަހަލަ އަސަރުތަކެއް ކުރެ އެވެ. މީގެ ސަބަބުން ރަހިމުގެ ހަރަކާތްތައް އިތުރުވެ އޮކްސިޓޯސިން ދިނުމުން ވޭންވަރު ނަގަން ފަށާ ގޮތަށް ވޭންވަރު ނަގަން ފަށަ އެވެ. ކަދުރަކީ މާބަނޑު މީހުންނަށާއި އެމީހުންގެ ތުއްތު ދަރީންނަށް އެންމެ ފައިދާހުރި ކާނާގެ އެއްބާވަތްކަމާމެދަށް ޝައްކެތްކުރާނެ ކަމެއް ނެތެވެ. މާބަނޑު މީހުންނަށް ފަސޭހައިން ވިހެއުމަށް މަގުފަހިވާ މާއްދާތަކެއް ކަދުރުގައި ހިމެނޭތީ މިއީ މާބނޑުމީހުންނަށްވެސް އެހާމެ ރަނގަޅު ލުއި ކެއުމެކެވެ. އަދި ކަދުރުން ހަށިގަނޑަށް ބޭނުންވާ ތޮބީއީ މޭވާގެ ފޮނިކަން ފުރިހަމައަށް ލިއްބައިދެ އެވެ.
ފުރިހަމަ ސިއްހަތެއްގައި ހުރުމަށް ބޭނުންވާ ކާނާގެ ތެރޭގައި ކަދުރަކީ ހަމަ އެންމެ ރަނގަޅު އެންމެ ފައިދާ ހުރި އެއް މޭވާ އެވެ. ކަދުރުގެ މުހިންމުކަމާއި އުފާވެރިކަން މުސްލިމުންނަށް ވަކީން ހާއްސަ ނަމަވެސް ކަދުރުން ލިބޭ ފައިދާތަކަށް އެންމެ ލިޔުމަކުން އިންސާފެއް ނުކުރެވޭނެ އެވެ.
އަދި އެއް ވާހަކައެވެ.
ކަދުރުން ލިބޭ ފައިދާތައް ގިނަ ނަމަވެސް ހަކުރު ބައްޔަށް ބޭސްކުރާ ފަރާތްތަކުން ކަދުރު ބޭނުންކުރާއިރު ސިއްހީ މާހިރެއްގެ އިރުޝާދު ހޯދުން މުހިއްމެވެ. ސަބަބަކީ ކަދުރަކީ ހަކުރުގެ މާއްދާ ގިނަ އަދަދަކަށް އެކުލެވޭ މޭވާއަކަށް ވީތީއެވެ.