ފަނޑިޔާރު އަޒްމިރަލްދާގެ މައްޗަށް ޖޭއެސްސީން ބަލަމުން އަންނަނީ އޭނާގެ ފިރިކަލުން ބަންދުކުރި މައްސަލައެއްގައި ދަށުކޯޓްގެ ފަނޑިޔާރުންނަށް ނުފޫޒު ފޯރުވިކަމަށް ބުނާ މައްސަލައެކެވެ. މި މައްސަލާގައި ޖޭއެސްސީއަށް ޖަވާބުދާރީވާން އަޒްމިރަލްދާ ހާޒިރުވާން ޖެހެނީ މާދަމާއެވެ.
ފަނޑިޔާރު އަޒްމިރަލްދާގެ ގާނޫނީ ވަކީލު އިބްރާހީމް ޝަމީލް ވިދާޅުވީ ޖޭއެސްސީން ޑރ. އަޒްމިރަލްދާގެ މައްޗަށް ބަލަމުން އަންނަ ސުލޫކީ މައްސަލައިގެ ހުރިހާ އަޑުއެހުންތައް އާއްމުކޮށް ހުޅުވާލައިގެން ކުރިޔަށް ގެންދިޔުމަށް އެދިފައިވާކަމަށެވެ.
މިކަމާއި ގުޅިގެން އަދި ޖޭއެސްސީން ގޮތެއް ނިންމާފައެއް ނުވެއެވެ.
މި މައްސަލާގައި ފަނޑިޔާރު މަހާޒު އަލީ ޒާހިރުގެވެސް ސުލޫކީ މައްސަލައެއް ޖޭއެސްސީން އަންނަނީ ބަލަމުންނެވެ. މަހާޒްވެެސް މާދަމާ ޖޭއެސްސީއަށް ހާޒިރުވުމަށް ވަނީ އަންގާފައެވެ.
ސުޕްރީމް ކޯޓުގެ ބެންޗުގައި ތިއްބެވި ފަނޑިޔާރުންގެ ތެރެއިން ފަނޑިޔާރު ހުސްނުއްސުއޫދު، މަހާޒު އަލީ ޒާހިރު އަދި ޑރ. އަޒްމިރަލްދާ ޒާހިރު ވަނީ ސުލޫކީ މައްސަލަތަކެއް ބަލަމުންދާކަމަށް ބުނެ ސަސްޕެންޑް ކޮށްފައެވެ.
ޖޭއެސްސީން ބަލަމުން އަންނަނީ އުފައްދާފައިވާ މައްސަލަތަކެއް ކަމަށް ވިދާޅުވެ ފަނޑިޔާރު ހުސްނުއްސުއޫދު، މިހާރު ވަނީ މަގާމުން އިސްތިއުފާ ދެއްވާފައެވެ.
މި ތިން ފަނޑިޔާރުން ކުއްލިއަކަށް ސަސްޕެންޑް ކުރީ ސުޕްރީމް ކޯޓުގެ ފަނޑިޔާރުންގެ ބެންޗު ހަތަކުން ފަހަކަށް މަދުކުރުމަށް ރައްޔިތުންގެ މަޖިލީހުން ގާނޫނަށް ގެނައި އިސްލާހު ފާސްކުރިތާ ކުޑަ ވަގުތުކޮޅެއްގެ ތެރޭގައެވެ. އަދި ފަނޑިޔާރުން ސަސްޕެންޑް ކުރުމާއެކު، ގާނޫނުއަސާސީއަށް ގެނެވުނު އިސްލާހުގެ ބާތިލްކަމާ ގުޅިގެން ސުޕްރީމް ކޯޓުގައި ބޭއްވުމަށް ހަމަޖެހިފައިވާ އަޑުއެހުމެއް ވެސް ވަނީ ކެންސަލްވެފައެވެ.
