މި ސްކޮލަރޝިޕް ދޫކުރަނީ ހަމައެކަނި އިސްލާމީ ދާއިރާއަށް ކަމަށް ޒަކާތު ހައުސްގެ ޑިރެކްޓާ ޖެނެރަލް ފަލީލަތުއްޝައިހް އިއްޒައްދީން އަދުނާން ވިދާޅުވިއެވެ.
މި އާ ސްކޮލަރޝިޕް ލިބޭނީ ރާއްޖޭގެ ގައުމީ ސަނަދުތަކުގެ އޮނިގަނޑުގެ ލެވެލް 5 އިން ފެށިގެން ލެވެލް 10 އާ ހަމައަށް ހުރި ކޯސްތައް ހެދުމަށެވެ. ޒަކާތު ހައުސްއިން ބުނީ މި ސްކޮލަރޝިޕްގައި ދަރިވަރުންގެ ކިޔެވުމުގެ ހުރިހާ ހަރަދެއް ހިމެނޭނެ ކަމަށެވެ.
ސްކޮލަރޝިޕް ލިބޭނީ ހަމައެކަނި މޯލްޑިވްސް ކޮލިފިކޭޝަން އޮތޯރިޓީން ވެލިޑޭޓްކުރާ ކޯސްތައް ހިންގާ، އަދި އެ އޮތޯރިޓީން ގަބޫލުކުރާ މަރުކަޒުތަކަށް ކަމަށް ޒަކާތު ހައުސްއިން މައުލޫމާތު ދީފައިވެއެވެ. ރާއްޖެއިން ބޭރުގައި ކިޔަވާނަމަ، އޯއައިސީ ގައުމުތަކަށް އިސްކަން ދެވޭނެ ކަމަށް ވެސް އުސޫލުގައި ބަޔާންކޮށްފައިވެއެވެ.
މަތީ ތައުލީމަށް އެހީ ދިނުމުގެ އާ އުސޫލު ޒަކާތު ފަންޑުން އެކުލަވާލީ މިދިޔަ އަހަރުގެ ޑިސެމްބަރު މަހުގައެވެ. މި އުސޫލުގެ ދަށުން ކިޔެވުމަށް އެދޭ ފަރާތްތަކަށް ސްކޮލަރޝިޕަށް އެދި ހުށަހެޅުމުގެ ފުރުސަތު ހުޅުވާލަން އަވަހަށް އިއުލާން ކުރާނެ ކަމަށް ޒަކާތު ހައުސްއިން މައުލޫމާތު ދީފައިވެއެވެ.
