ރޭ ސިފައިންނާއި ފުލުހުން ގުޅިގެން ހިންގި އޮޕރޭޝަންގައި މާލޭގެ ބައެއް ތަންތަން ބަލާ ފާސްކޮށް 3 މީހަކު ހައްޔަރުކޮށްފައިވާކަމަށް ފުލުހުން ވަނީ ބުނެފައެވެ.
މި އޮޕަރޭޝަނާއި ގުޅިގެން ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ ކައުންޓާ ޓެރަރިޒަމް އޮޕަރޭޝަންތަކަކީ ރާއްޖޭގެ ސަލާމަތާއި ރައްކާތެރިކަމަށްޓަކައި، އިންޓެލިޖެންސް ރިޕޯޓުތަކާ ގުޅިގެން އާންމުކޮށް ހިންގާ އޮޕަރޭޝަންތައް ކަމަށެވެ.
އަދި ރޭ ހިންގި އޮޕަރޭޝަންގައި ތިން މީހަކު ހައްޔަރުކޮށް ބައެއް ގެތަކާއި އުޅަނދުތައް ފާސްކޮށްފައިވާކަމަށެވެ. އަދި މިކަންކަން ކޮށްފައިވަނީ ކޯޓް އަމުރެއްގެ ދަށުންކަމަށްވެސް ފޮރިން މިނިސްޓްރީގެ ބަޔާނުގައިވެއެވެ.
މައުލޫމާތު ލިބިފައިވާ ގޮތުގައި ރޭ ހިންގި އޮޕަރޭޝަނުގެ ތެރެއިން ހައްޔަރުކޮށްފައިވަނީ ޖުމްހުރީ މައިދާން ސަރަހައްދުން ބަލާ ފާސްކުރި ލޮރީއެއް ދުއްވަން އިން މީހަކާއި ހުޅުމާލެ ދެވަނަ ފިޔަވަހީގައި ހުންނަ ވިނަރެސް ފުލެޓަކުން މީހެކެވެ.
މިކަމާ ގުޅިގެން ފުލުހުން އަދި ސިފައިންގެ ރަސްމީ ބަހެއް ލިބިފައިނުވާއިރު ހައްޔަރުކުރި މީހުންގެ އަދަދު އިތުރުވުމަކީ ވެސް އެކަށީގެންވާ ކަމެކެވެ. އެނގިފައިވާގޮތުން މި އޮޕަރޭޝަން ފެށީ މާލޭގައި ވަރުގަދަ ނިރުބަވެރި ހަމަލާތަކެއް ދޭން އުޅޭ ކަމުގެ އިންޓަލިޖެންސް މައުލޫމާތުތަކެއް ލިބިގެންނެވެ.
