ގަލޮޅުގައި ހުންނަ ގެއެއްގެ ވެރިމީހާ އަށް ބިރުދައްކައި އިންޒާރު ދިން މައްސަލައަކާ ގުޅިގެން އިހައްރޭ ދަންވަރުވަނީ ހަތަރު މީހުން ހައްޔަރުކޮށްފައެވެ.
މާލޭގެ ގެއެއްގެ ވެރިމީހާ އަށް ބިރުދައްކައި، އަނިޔާކުރި މައްސަލާގައި ހައްޔަރުކޮށްފައިވާ މީހުން
1. އަލީ ނަވާފު، 21، ފަޒާ، ތ. ގުރައިދޫ
2. މުހައްމަދު އަޒާން، 23، ހަވޭލީ، ނ. މަނަދޫ
3. އިބްރާހިމް އަހުނަފް، 21، އެލަސް، ނ. ވެލިދޫ
4. މުހައްމަދު އަފްލާހު، 23، ރީތިހިޔާ، އއ. މާޅޮސް
އެ ހަތަރު މީހުންގެ ބަންދަށް 15 ދުވަސް ޖަހާފައި ވާއިރު، ސޯޝަލް މީޑިއާގައި އަންނަނީ އެ ގޭގެ ވެރިމީހާ އަށް އަނިޔާކުރާ ވީޑިއޯއެއް ވެސް ދައުރު ކުރަމުންނެވެ.
އެ މީހާގެ އަނގައިގައި ޓޭޕު އަޅައި ބަންދުކޮށް، އެކަކު ހިފަހައްޓައިގެން ހުންނައިރު އިތުރު މީހަކު ރޯކޮށްފައި އޮތް ސިނގިރޭޓެއް އެ މީހާގެ ގައިގައި ޖައްސާތަން އެ ވީޑިއޯ އިން ފެނެ އެވެ. އިތުރު މީހަކު ބޮޑު ހީރަސް ދައްޗަކުން ޖަހަން ވެސް އުޅެ އެވެ.
މިއީ ކޮން މައްސަލައެއްގައި ހިނގި ކަމެއްކަން އަދި ސާފެއް ނުވެ އެވެ.
މި ގްރޫޕުގެ ބަންދު އަމުރު ރިޕޯޓުގައި އެ މީހުންނާ ހަވާލާދީ ބުނެފައިވާ ގޮތުގައި އެ މީހުން އެ ތަނަށް ދިޔައީ އެއީ ރައްޓެއްސަކު ހިފާފައިވާ ތަނަކަށްވާތީ އެތަން ސާފުކޮށްދިނުމަށް ކަމަށެވެ. އެތަނަށް ދިޔައީ ފައިސާ ލިބޭގޮތަށް އެތަން ސާފު ކުރަން ކަމަށާއި އެއްވެސް އެއްޗަކަށްވެސް ގެއްލުން ދީފައިނުވާނެ ކަމަށް އެ މީހުންނާ ހަވާލާދީ ބަންދު އަމުރުގައި ބުނެފައިވެ އެވެ.
