މި އެއްބަސްވުންތަކުގެ ދަށުން 4 ރަށެއްގައި ހޮސްޕިޓަލް އިމާރާތްކުރުމާއި 5 ރަށެއްގައި ސިއްހީ މަރުކަޒު އިމާރާތްކުރުމުގެ މަސައްކަތް ކުރިއަށް ގެންދާނެއެވެ.
ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)އާ ހަވާލުކޮށްފައިވަނީ ހދ. ހަނިމާދޫ ހޮސްޕިޓަލް، އދ. މާމިގިލީ ހޮސްޕިޓަލް، ކުޅުދުއްފުށީ ދަމަނަވެށި އަދި ކ. ގާފަރު ސިއްހީ މަރުކަޒު އިމާރާތްކުރުމުގެ މަސައްކަތެވެ. މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާ ހަވާލުކޮށްފައިވަނީ ތ. ވިލުފުށި ހޮސްޕިޓަލް، ވ. ފެލިދޫ ހޮސްޕިޓަލް، ނ. ފޮއްދޫ ސިއްހީ މަރުކަޒު އަދި ށ. މާއުނގޫދޫ ސިއްހީ މަރުކަޒު އިމާރާތްކުރުމުގެ މަސައްކަތެވެ. ފެނަކަ ކޯޕަރޭޝަނާ ހަވާލުކޮށްފައިވަނީ ހދ. މަކުނުދޫ ސިއްހީ މަރުކަޒު އިމާރާތްކުރުމުގެ މަސައްކަތެވެ.
ސޮއިކުރުމުގެ ރަސްމިއްޔާތުގައި ހެލްތް މިނިސްޓަރު އަބްދުﷲ ނާޒިމް އިބްރާހިމް ވާހަކަދައްކަވަމުން ވިދާޅުވީ މިއީ އެ ރަށްތަކާއި ސަރަހައްދުތަކުގައި ސިއްހީ ހިދުމަތް ފުޅާކުރުމަށް ފެށޭ ވަރަށް މުހިންމު މަސައްކަތެއް ކަމަށެވެ. އޭނާ ވިދާޅުވީ މިއީ ސިއްހީ ދާއިރާގެ އުމްރާނީ ވަސީލަތްތައް ގާއިމުކޮށްދެއްވުމަށް ރައީސުލްޖުމްހޫރިއްޔާ ވެވަޑައިގެންފައިވާ ވައުދުގެ ދަށުން ފެއްޓެވި މަސައްކަތްތަކެއް ކަމަށެވެ.
މިނިސްޓަރު ވިދާޅުވީ މި މަޝްރޫއުތައް ހަވާލުކުރި ކުންފުނިތަކާއި މިނިސްޓްރީ ގުޅިގެން، ޕްރޮޖެކްޓްތައް ޓައިމްލައިނާ އެއްގޮތަށް އަވަހަށް ނިންމާ ހިދުމަތް ފަށާނެ ކަމަށެވެ.
