މި ބައްދަލުވުމުގައި ހެލްތު މިނިސްޓަރު އަބްދުﷲ ނާޡިމް އިބްރާހިމް އަދި ސޯޝަލް އެންޑް ފެމިލީ ޑިވެލޮޕްމެންޓް މިނިސްޓަރު ޑރ. އާއިޝަތު ޝިހާމްގެ އިތުރުން މޯލްޑިވްސް ފުޑް އެންޑް ޑްރަގް އޮތޯރިޓީ، އާސަންދަ އަދި އެންސްޕާގެ އިސްވެރިން ބައިވެރިވިއެވެ.
ހެލްތް މިނިސްޓްރީން މައުލޫމާތު ދީފައިވާ ގޮތުގައި، މި ބައްދަލުވުމުގައި ބަލިމީހުންނަށް ފަސޭހައިން ބޭސް ލިބޭނެ އިންތިޒާމްތައް ހަމަޖެއްސުމާއި ބޭސް ލިބުމުގައި މިހާރު ހުރި ދަތިތައް ހައްލުކުރުމާ ގުޅޭގޮތުން މަޝްވަރާކުރެވުނެވެ. އަދި ބަލްކް ޕްރޮކިއުމަންޓް ނިޒާމުގެ ދަށުން ދުނިޔޭގެ ކުރިއަރާފައިވާ ގައުމުތަކުގެ މާކެޓްތަކުން ރާއްޖެއަށް ކޮލިޓީ ރަނގަޅު ބޭސް ގެނައުމުގައި ކުރެވެން ހުރި މަސައްކަތްތަކާ ބެހޭގޮތުން ވެސް ވަނީ މަޝްވަރާކުރެވިފައެވެ.
ބަލްކް ޕްރޮކިއުމަންޓް ނިޒާމުގެ ތެރެއިން ގެނެވޭ ބޭސްތަކާ ގުޅޭގޮތުން ޑޮކްޓަރުންނަށް މައުލޫމާތު ފޯރުކޮށްދިނުމުގެ މުހިންމުކަން ވެސް މި ބައްދަލުވުމުގައި ފާހަގަކުރެވުނެވެ. ހެލްތު މިނިސްޓަރު ކުރިން ވިދާޅުވެފައިވާ ގޮތުގައި، ރާއްޖޭގައި ބޭސް ވިއްކަމުން ގެންދަނީ އެންމެ ރަނގަޅު އަގުތަކުގައި ނޫނެވެ. އެހެންކަމުން، ބޭހުގެ އަގު ކޮންޓްރޯލްކުރުމަކީ ރައީސުލްޖުމްހޫރިއްޔާ އެޅުއްވި ފިޔަވަޅުތަކުގެ ތެރެއިން އެއް ފިޔަވަޅުކަމަށް މިނިސްޓަރު ވިދާޅުވެފައިވެއެވެ.
ސަރުކާރުގެ އަމާޒަކީ ބަލިމީހުންނަށް ބޭނުންވާ ބޭސްތައް އިތުރު ތަކުލީފަކާ ނުލާ ފާމަސީތަކުން ލިބޭނެ އިންތިޒާމު ހަމަޖެއްސުމެވެ. ހެލްތު މިނިސްޓަރު ވިދާޅުވެފައިވާ ގޮތުގައި، ބޭހުގެ މައްސަލައަށް ވަރަށް އަވަހަށް އެދެވޭ ހައްލެއް ލިބިގެންދާނެއެވެ. ސިއްހީ ދާއިރާގައި އަބަދުވެސް ކަންކަން ހާސިލްކުރުމުގައި ގޮންޖެހުންތައް ބޮޑުކަމަށާއި، ކުރިން ބައްޓަންވެފައި ހުރި ނިޒާމުގެ ލޫޕްހޯލްތައް ނުވަތަ ނާޖާއިޒު ފައިދާ ނެގުން ހުއްޓުވުމަށް ސަރުކާރުން މަސައްކަތްކުރަމުންދާކަން މިނިސްޓަރު ފާހަގަކުރިއެވެ.
