ވެމްކޯއިން ބުނީ މި ރޯދަމަހުގެ މިދިޔަ ދުވަސްތަކުގައި މާލޭ ސަރަހައްދުން ދުވާލަކު 3614 ޓަނުގެ ކުނި ނަގަން ޖެހޭކަމަށެވެ.
އެގޮތުން މާލޭ ސަރަހައްދުން އެންމެ ގިނަ ކުނި ނަގަމުން އަންނަނީ މާލެއިންކަމަށާއި ވެރިރަށް މާލެއިން ދުވާލެއްގެ މައްޗަށް އެވެރެޖުކޮށް 1980 ޓަނުގެ ކުނި ނަގާކަމަށް ވެމްކޯއިން ބުނެއެވެ. މީގެއިތުރުން ހުޅުމާލެއިންވެސް މި ރޯދަމަހު ގިނަ އަދަދެއްގެ ކުނި ނަގަންޖެހޭކަމަށް ވެމްކޯއިން ބުނެއެވެ. ހުޅުމާލެއިން މި ރޯދަމަހު ދުވާލެއްގެ މައްޗަށް އެވްރެޖުކޮށް މިހާތަނަށް 1280 ޓަނުގެ ކުނި ނަގާކަމަށް ވެމްކޯއިން ބުނެއެވެ. އަދި ވިލިމާލެއިން ދުވާލެއްގެ މައްޗަށް 354 ޓަނުގެ ކުނި ނަގާކަމަށްވެސް ވެމްކޯއިން ބުނެއެވެ.
ރޯދަމަހު މާލޭގެ ގޭބިސީތަކުން ކުނި ނެގުމުގެ ހިދުމަތް ދޭނީ ރޭގަނޑު 08:30 އިން ދަންވަރު 02:30 އަށެވެ. ހުޅުމާލޭގައި ކުނި ނަގާނީ ރޭގަނޑު 09:00 އިން ދަންވަރު 01:00 އަށެވެ. އަދި ވިލިމާލޭގައި ހިދުމަތް ދޭނީ ރޭގަނޑު 09:30 އިން ދަންވަރު 01:30 އަށެވެ.
ކުނި ނެރުމުގައި ބިއްލޫރި ނުވަތަ ތޫނު އެއްޗެއް އުކާލާނާމަ، އެއިން ވެށިފާރަވެރިންނަށް ގެއްލުން ނުވާނެހެން ރީއްޗަށް ބަންދު ކޮށްފައި ވަކިން ބެހެއްޓުމަށް ވެމްކޯއިން އެދެއެވެ.
