މިއަދު ފާހަގަކުރާ ދުނިޔޭގެ ޓީބީ ދުވަހުގެ މުނާސަބަތުގައި ރައީސް ކުރެއްވި ޕޯސްޓުގައި ރާއްޖޭގައި ޓީބީ ކޮންޓްރޯލް ޕްރޮގްރާމް ކާމިޔާބުކަމާއެކު ކުރިއަށް ގެންދެވުމުން، ޓީބީ ބަލި ދެނެގަތުމުގެ މިންވަރު 70 ޕަސަންޓަށް އިތުރުކުރުމުގެ އަމާޒާއި، އެ ބައްޔަށް ފަރުވާ ދެވޭ މިންވަރު 85 ޕަސަންޓަށް އިތުރުކުރުމުގެ އަމާޒަށް ވާސިލުވެފައިވާ ފަސް ގައުމުގެ ތެރޭގައި ރާއްޖެ ހިމެނިފައިވާކަން ރައީސް ފާހަގަކުރައްވާފައިވެއެވެ. މިކަމުން ދައްކުވައިދެނީ ޞިއްހީ ދާއިރާގެ ފަންނީ މަސައްކަތްތެރީން މިކަމަށް ދެއްވާ އަހަންމިއްޔަތުކަމެވެ.
ޓީބީ ހުއްޓުވުމާއި، ބައްޔަށް ސްކްރީންކުރުމާއި، ބަލި ޑައަގްނޯޒްކޮށް ފަރުވާދިނުން، ރާއްޖޭގެ އަސާސީ ސިއްހީ ފަރުވާގެ މޮޑެލްއާ އެކުލަވާލައިގެން، އެބައްޔަށް ލިބޭ ފަރުވާ ފަސޭހައިން ލިބޭނޭ އިންތިޒާމު ކުރައްވަމުންގެންދަވާކަމަށްވެސް ރައީސް ވިދާޅުވިއެވެ.
މުސްތަގުބަލުގެ ޖީލުތަކަށް، ޓީބީ އިން ސަލާމަތްވެފައިވާ، ދުޅަހެޔޮ ރާއްޖެއެއް ބިނާކޮށްދިނުމަށް އެންމެން އެކުގައި މަސައްކަތްކުރުމަށް ރައީސް އިލްތިމާސްކުރެއްވިއެވެ. ޓީބީ ބަލި ކޮންޓްރޯލްކުރުމަށް ސަރުކާރުން ކުރައްވަމުންދާ މަސައްކަތްތަކަށް އެހީތެރިކަން ފޯރުކޮށްދިނުމަށް އެންމެހާ ފަރާތްތަކަށް ރައީސް ގޮވާލެއްވިއެވެ.
