ސައީދު މިހެން ވިދާޅުވީ ހއ. އުތީމުގައި އޭޓީއެމް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
އެމަނިކުފާނު ވެރިކަމާ ހަވާލުވެވަޑައިގެންނެވިއިރު، ރާއްޖެ އޮތީ ވަރަށް ބޮޑަށް ގޯސްވެ، ދަރާވިކި ދިއުމުގެ ނުރައްކަލުގައި ކަމަށްވެސް ސައީދު ވިދާޅުވިއެވެ.
އަދި ރައީސް މުއިއްޒު ގައުމުގެ އިގްތިސާދީ މައްސަލަތައް ހައްލުކުރައްވަމުން ގެންދަވާއިރު، ރައްޔިތުންނަށް މުހިންމު ވަސީލަތްތައް ވަރަށް ބާރު ސްޕީޑުގައި ފޯރުކޮށްދެއްވަމުން ގެންދަވާ ކަމަށް ސައީދު ވިދާޅުވިއެވެ.
ސައީދު އިތުރަށް ވިދާޅުވީ، ރައީސް މުއިއްޒު ރައްޔިތުންގެ ކަންކަން ގާތުން ބައްލަވަމުން ގެންދަވާ ކަމަށެވެ. އެގޮތުން ތެލެސީމިއާއަށް ފަރުވާ ހޯދާ ކުދިންނަށް ދިމާވި ދަތިތައް ހައްލުކޮށްދެއްވުމަށް، އެމަނިކުފާނު އަމިއްލަފުޅަށް ނުކުމެވަޑައިގެން މުހިންމު ފިޔަވަޅުތަކެއް އަޅުއްވާފައިވާ ކަމަށާއި، ތެލެސީމިއާ ސެންޓަރަށް ޒިޔާރަތްކުރައްވައި ކުދިންގެ ހާލު ގާތުން ބެއްލެވި ކަމަށްވެސް ސައީދު ވިދާޅުވިއެވެ.
މިހުރިހާ ކަމަކުންވެސް ސާބިތުވަނީ ރައީސް މުއިއްޒު ރެއާއި ދުވާލު ރައްޔިތުންގެ ކަންކަމަށް ހާއްސަ ސަމާލުކަމެއް ދެއްވަމުން ގެންދަވާ ކަމަށް އިކޮނޮމިކް މިނިސްޓަރު ސައީދު ވިދާޅުވިއެވެ.
