ރައީސް މައުމޫން މިދިޔަ އަންގާރަ ދުވަހު ލިޔުއްވި ލިޔުވުމެއްގައި ވިދާޅުވީ މިއަހަރުގެ ފިތުރު އީދު ވާނީ އަންނަ އާދިއްތަ ދުވަހަށްކަމަށް ވަރަށް ބޮޑަށް ޔަގީންކުރެވޭކަމަށެވެ.
ފަލަކީ އިލްމުވެރިޔާ އަދި ހަނދު ބެލުމުގައި ގިނަ ބައެއްގެ އިތުބާރު ހޯދާފައިވާ ކުރީގެ ރައީސްގެ ލިޔުއްވުމުގައި ވިދާޅުވީ ވަރަށް ގިނަ އިސްލާމީ ގައުމުތަކަށް އީދު ވާނީ އަންނަ އާދިއްތަ ދުވަސްކަމަށެވެ. ސަބަބެއްކަމަށް ވިދާޅުވީ ސައުދީ އަރަބިއްޔާ، މިސްރު، ތުރުކީ އަދި މޮރޮކޯ ފަދަ އިސްލާމީ ގައުމުތަކަށް މި މަހުގެ 29 ވަނަ ދުވަހު އިރުއޮއްސުމަށް ފަހު ހަނދު ނުއޮއްސި 8 މިނެޓާއި 20 މިނެޓާ ދެމެދުގެ މިންވަރަކަށް ހުންނާނެ ކަމަށް ފަލަކީ ހިސާބުން ދައްކާތީކަމަށެވެ.
މި ވާހަކަތަކަށް ރައްދުދެއްވާ މައުމޫންގެ ލިޔުންތައް ގެނެސްދިން ނޫސްތަކުގެ ސްކްރީން ޝޮޓް ހިމަނާ ހަސަން ވަނީ މައުމޫންގެ އެ ވާހަކަތަކަށް ރަނގަޅު ނޫންކަމަށް ބުނެ ދަލީލު ދައްކަވާފައެވެ.
އައު ހަނދު އުފަންވަނީ މުޅި ދުނިޔެއަށް އެއް ހިނދަކު
ހަސަން ލިޔުއްވުމުގައި ވިދާޅުވީ އެކި ގައުމަތަކަށް އިރު އެކި ވަގުތުތަކުގައި އެރި ނަމަވެސް އައު ހަނދު އުފަންވަނީ މުޅި ދުނިޔެއަށް އެއް ހިނދަކުކަމަށެވެ.
މައްކާއަކަށްވެސް ހަނދެއް ނުފެންނާނެ
މައުމޫން ލިޔުއްވުމުގައި ސައުދީއަށް މި މަހުގެ 29 ވަނަ ދުވަހު އިރުއޮއްސުމަށް ފަހު ހަނދު ނުއޮއްސި 8 މިނެޓާއި 20 މިނެޓާ ދެމެދުގެ މިންވަރަކަށް ހުންނާނެކަމަށް ބުނށާ ވާހަތަކަށްވެސް ހަސަން ވަނީ ރައްދުދެއްވާފައެވެ. ހަސަން ވިދާޅުވީ މުޅި އޭޝިއާގެ ބައްރަށް 29 މާޗްގައި ހަނދެއް ނުފެންނާނެކަމަށެވެ. ފެނުމުގެ ފުރުސަތު އޮތީ ހަމައެކަނި އެމެރިކާގެ ހުޅަނގު ބިތަށްކަމަށް ހަސަން ލިޔުއްވުމުގައި ވެއެވެ. ހަސަން ވިދާޅުވީ މައްކާގެ އުޑުމަތި އެދުވަހު ކިތަންމެ ސާފު ނަމަވެސް އެ ގައުމަށްވެސް އެރޭގެ ހަނދު ނުފެންނާނެކަމަށެވެ.
ހަނދު ލެއްވުމުގައި ސަޢޫދީ އެރެބިޔާއަށް ހަނދު ފެނުނުތޯ ބަލަން ޖެހޭތަ
ހަނދު ސާބިތުކުރުމުގައި ރާއްޖޭގައި އަމަލުކުރަމުން އަންނަ އުސޫލަކީ ރާއްޖެއަށް ހަނދު ނުފެނިއްޖެނަމަ އިސްލާމީ ގައުމަކަށް ހާއްސަކޮށް ސައުދީއަށް ފެނުނުތޯ ބަލާ އެ ގޮތަށް އަމަލުކުރުމެވެ. އަދި ރާއްޖޭގައި ހަނދު ސާބިތުކުރުމުގެ ކަންކަންވެސް ކުރަނީ ރާއްޖެއަށް އިރުއޮއްސި އެތައް އިރެއް ވާ ފަހުން އިރު އޮއްސޭ ސައުދީ އަރަބިއްޔާއިން އެމީހުން ނިންމާ ނިންމުން އިއުލާން ކުރާ ވަގުތަށް ބަަލައިގެންނެނެވެ.
ހަސަން ވިދާޅުވީ އިސްލާމީ ގައުމަކަށް ހަނދު ފެނުމުން އެއަށް ތަބާވެ ދުވަސް ކަޑައަޅަން ފެށީވެސް މައުމޫންގެ ވެރިކަމުގައިކަމަށެވެ. އެހެންނަމަވެސް އޭގެ ކުރިން އިސްލާމީ ދުނިޔޭގައިވެސް 1300 ވަރަކަށް އަހަރު ވަންދެން ހަނދު ލައްވަނީ އެ ޤައުމަކަށް ހަނދު ފެނުމުންކަމަށް ހަސަން ވިދާޅުވިއެވެ. އަދި މިކަމުގައި ދީނީ އިލްމުވެރިންގެ ބަސްވެސް ހަސަން ވަނީ އޭނާގެ ލިޔުމުގައި ހިމަނުއްވާފައެވެ.
ރައީސް މައުމޫމާއި ހަސަން ހަމީދުގެ ހިޔާލު ފިތުރު އީދަށް ހަނދު ސާބިތުކުރުމުގައި ތަފާތެވެ. ކަލަންޑަރު ބުނަނީ އީދަކީ އަންނަ ހޯމަ ދުވަސްކަމަށެވެ. އެހެންވީމާ އީދު ވާނީ އާދިއްތަ ނޫނީ ހޯމަ ތޯ އެނގޭނީ އަންނަ ހޮނިހިރު ދުވަހުގެ ރެއެވެ.
