މި އަހަރުގެ ފިތުރު ޒަކާތުގެ ގޮތުގައި ލިބޭ ފައިސާ ބަހާނީ ހުރިހާ ފަގީރުންގެ މެދުގައި އެއް ހަމައަކުން ކަމަށާއި އެގޮތަށް ބަލާއިރު ކޮންމެ މީހަކަށް ވެސް 4،500 ރުފިޔާ ލިބޭނެ ކަމަށް އިސްލާމިކް މިނިސްޓްރީން ބުނެފި އެވެ.
Advertisement
އިސްލާމިކް މިނިސްޓަރު ޑރ. މުހައްމަދު ޝަހީމް ވިދާޅުވީ މި އަހަރު ފިތުރު ޒަކާތް ބަހާނީ ފަގީރުންގެ ދަފްތަރުގައި ތިބި އެންމެންނަށް އެއް ހަމައަކުން ކަމަށާއި އެ ބަދަލަކީ ޒަކާތުގެ މަގުސަދުގައި ހިމެނޭ އިޖުތިމާއީ އަދާލަތު ގާއިމުކުރަން ގެނެވުނު ބަދަލެއް ކަމަށެވެ.
ފިތުރު ޒަކާތުގެ ގޮތުގައި މިހާތަނަށް 12.4 މިލިއަން ރުފިޔާ ލިބިފައިވާއިރު، އެ ފައިސާ ބަހާނީ އަލަށް ގެނެވުނު ބަދަލާ އެކު ފަގީރުންގެ ދަފްތަރުގައި ތިބި އެންމެންނަށް އެއްހަމައަކުންނެވެ. ފަގީރުންގެ ދަފްތަރުގައި މި ވަގުތު ރަޖިސްޓްރީވެފައި ތިބި މީހުންގެ އަދަދެއް ސާފެއް ނުވެ އެވެ. އިސްލާމިކް މިނިސްޓްރީން މިދިޔަ އަހަރު ބުނީ އެ ލިސްޓުގައި 5،023 މީހުން އެބަތިބި ކަމަށެވެ.
"މީގެ ކުރިން މިކަން ކުރާ ގޮތަކީ އެރަށަކުން ލިބޭ އެއްޗެެއް އެކަނި އެރަށަކަށް ލިބެނީ. މިހެން މިކަން ކުރީމަ ބައެއް ރަށް ރަށުގައި ފަގީރުންނަށް ލިބެނީ ވަރަށް މަދު އެއްޗެއް. މިހާރު ތަފާތަކީ މުޅިރާއްޖެއަކީ އެއްބައެއް ކަމުގައި ބަލައި އެގޮތުން ބެހުން. މިއީ ރާއްޖޭގެ ފިތުރު ޒަކާތުގެ ތާރީހުގައި ފުރަތަމަ ފަހަރަށް ގެނެވުނު މިފަދަ ބަދަލު،" ޝަހީމް ވިދާޅުވި އެވެ.
މިއަހަރު ފިތުރު ޒަކާތަށް މިހާތަނަށް 12.4 މިލިއަން ރުފިޔާ ލިބިފައިވާ ކަމަށް ޝަހީމް ވިދާޅުވި އެވެ.
މާލޭ ސަރަހައްދުގައި މިދިޔަ އަހަރު ފިތުރު ޒަކާތުގެ ގޮތުގައި ބޮލަކަށް 8،000 ރުފިޔާ ބެހި އެވެ. އަދި 2023 ގައި ފިތުރު ޒަކާތުގެ ގޮތުގައި ނުވަ މިލިއަން ރުފިޔާ ލިބިފައި ވާއިރު، މާލެއިން 1736 މީހަކަށް ބަހާފައިވަނީ ބޮލަކަށް 3،450ރ. ގެ މަގުންނެވެ.
