ރާއްޖެ ގަޑިން މިއަދު ހެނދުނު 11:32 ހާއިރު ބިން ހެލުން އައިސްފައިވަނީ މާލެ އާއި 3121 ކިލޯމީޓަރު ދުރުން 7.6 މެގްނެޓިއުޑްގެ ބާރުމިނު ގައެވެ.
ސެންޓްރަލް މިޔަންމާއަށް މިއަދު 7.7 މެގްނިޓިއުޑްގެ ބާރުމިނުގައި އައި ބިންހެލުމުގެ އަސަރުކޮށް ގިނަ އަދަދެއްގެ ދިވެހިން ދަތުރުކުރާ ތައިލޭންޑުގައި ކުއްލި ނުރައްކަލުގެ ހާލަތު އިއުލާނުކޮށްފި އެވެ.
އެމެރިކާގެ ޖިއޮލޮޖިކަލް ސާވޭއިން ބުނާ ގޮތުގައި ބިން ހެލުން އައީ ބިންގަނޑުގެ 10 ކިލޯމީޓަރު އަޑިއަށެވެ. ބިންހެލުން އައީ މިޔަންމާގެ ދެވަނައަށް އެންމެ ބޮޑު ސިޓީ ކަމަށްވާ މަންޑަލޭގެ 17 ކިލޯމީޓަރު ބޭރަށެވެ.
އެ ގައުމުގައި ވެސް ވެސް ކުއްލި ނުރައްކަލުގެ ހާލަތު އިއުލާނުކޮށްފައިވާއިރު އެ ގައުމުގެ ބައެއް އިމާރާތްތަކަށް ވެސް ގެއްލުންތަކެއް ވަނީ ލިބިފަ އެވެ. އެންމެ ފުރަތަމަ އައި ބިންހެލުމަށް ފަހު ދެވަނަ ޓްރެމަރެއް 6.4 މެގްނިޓިއުޑްގައި އައިސްފައިވެ އެވެ.
މެޓް އޮފީހުން ވަނީ މި ބިންހެލުމުގެ އަސަރު ރާއްޖެއަށް ކުރާނެ ކަމަށް ނުފެންނަ ކަމަށް ބުނެފަ އެވެ.
މި ބިންހެލުމުގައި މިޔަންމާގެ ވެރިރަށް ނޭޕިޑޯގެ މަގުތައް ހަލާކުވެ، އިމާރާތްތަކަށް ގެއްލުންވެފައި ވާއިރު ގިނަ އަދަދެއްގެ ބަޔަކު ވަނީ ހޮސްޕިޓަލަށް ގެންގޮސްފަ އެވެ.
ތައިލެންޑާއި މިޔަންމާގައި ވެސް ކުއްލި ހާލަތު އިއުލާނު ކޮށްފައި ވާތީ، އެ ދެ ގައުމުގެ ކަމާބެހޭ އިދާރާތަކުން އަންގާ އެންގުންތަކަށް ސަމާލުވެ، އެއާ އެއްގޮތަށް އަމަލު ކުރުމަށް ރާއްޖޭގެ ފޮރިން މިނިސްޓްރީން އިލްތިމާސްކުރި އެވެ
މި ކާރިސާއާ ގުޅިގެން، ތައިލެންޑުގައި ތިބި ދިވެހިންގެ ތެރެއިން އެއްވެސް އެހީތެރިކަމެއް ބޭނުންވާ މީހުން ނުވަތަ އިތުރު މައުލޫމާތެއް ސާފުކުރަން ބޭނުން ނަމަ އެ ގައުމުގައި ހުންނަ ރާއްޖޭގެ އެމްބަސީގެ ހޮޓްލައިން ނަންބަރަށް ނުވަތަ ފޮރިން މިނިސްޓްރީގެ ހޮޓްލައިން ނަންބަރަށް ގުޅުމަށް ދިވެހި ސަރުކާރުން އެދެ އެވެ.
މިޔަންމާގައި މިވަގުތު އެއްވެސް ދިވެއްސަކު އުޅޭ ނަމަ އަދި އެއްވެސް އެހީތެރިކަމެއް ބޭނުން ނަމަ ތައިލެންޑުގައި ހުންނަ ރާއްޖޭގެ އެމްބަސީ ހޮޓްލައިން ނަންބަރު: 611766502 66+ ގުޅުމަށް ފޮރިން މިނިސްޓްރީން އެދެ އެވެ. މިނިސްޓްރީ ހޮޓްލައިން ނަންބަރަކީ 9607983400+ އެވެ.
