އެކްސްގައި ކުރެއްވި ޕޯސްޓެއްގައި ފަލާހު ފާހަގަކުރެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒަކީ މި ގައުމު ދެކޭނެ، ގައުމަށް އެންމެ އަމާނާތްތެރި އަދި ރައްޔިތުންނަށް އެންމެ އޯގާތެރި ރައީސް ކަމަށެވެ.
ފަލާހު އިތުރަށް ވިދާޅުވެފައިވަނީ ރައީސްގެ ދެކަނބަލުން ބޭއްވި އީދު ސަލާމާއި އީދު ހަވީރުން ވަރަށް ގިނަ ވާހަކަތައް ދޭހަވެގެން ދިޔަ ކަމަށެވެ.
އިއްޔެ ހަވީރު ބޭއްވި އީދުގެ ހަރަކާތުގައި ރައީސް ޑރ. މުހައްމަދު މުއިއްޒާއި އެމަނިކުފާނުގެ އާއިލާއިން ބައިވެރިވެވަޑައިގެންނެވިއެވެ. މި ހަރަކާތުގައި ރައްޔިތުންނާއި ގާތުން ބައްދަލުކޮށް ރައްޔިތުންގެ އުފަލުގައި ރައީސް އާއި މެޑަމް ސާޖިދާ ވަނީ ބައިވެރިވެވަޑައިގެން އީދު އުފާ ފާޅުކޮށްފައެވެ. މިއީ އިދިކޮޅު އެމްޑީޕީން ސަރުކާރާ ދެކޮޅަށް ދައްކަމުންދާ ވާހަކަތަކަށް ރައްޔިތުން ދިން ޖަވާބެއް ކަމަށް ފަލާހު ވިދާޅުވެފައިވެއެވެ.
ރޯދަ މަހު މާލޭގައި އިދިކޮޅު އެންމެ ބޮޑު ޕާޓީ އެމްޑީޕީން ސިލްސިލާ މުޒާހަރާތަކެއް ބާއްވާފައިވާއިރު، ރޯދަ މަހުގެ ފަހު 10 ދުވަހަށް އެ މުޒާހަރާތައް މެދުކަނޑާލާފައިވެއެވެ. ނަމަވެސް ރޯދަ މަހަށްފަހު އަލުން މުޒާހަރާތައް ފަށާނެ ކަމަށް އެމްޑީޕީން ކުރިން ބުނެފައިވެއެވެ.
