ރައްޔިތުންގެ މަޖިލީހުގެ މެންބަރުންގެ މުސާރަ އާއި އިނާޔަތްތައް ކުޑަކުރަން ގޮވާލާ ޕެޓިޝަނެއްގައި ސޮއިކުރަން އިއްޔެ ވަނީ ފަށާފައެވެ. އޮންލައިންކޮށް ސޮއިކުރާ މި ޕެޓިޝަންގައި ވަނީ ރައްޔިތުން މަޖިލީހުގެ މެމްބަރުންގެ މުސާރަކުޑަކޮށް ކޮމެޓީ އެލަވަންސާއި ބޭސްފަރުވާގެ އެލަވަންސް ކަނޑާލުމަށް ގޮވާލާފައެވެ.
މިކަމާއި ގުޅިގެން ވެލިދޫ ދައިރާގެ މެމްބަރު މުހައްމަދު އައްބާސް އެކްސްގައި ކުރެއްވި ޕޯސްޓެއްގައި ވިދާޅުވީ ރައްޔިތުންނަށް ހަމައެކަނި އެހީތެރިކަމެއް ފޯރުކޮށްދެމުން އަންނަނީ ރައްޔިތުން މަޖިލީހުގެ މެމްބަރުންކަމަށެވެ. އެހެންކަމުން މެމްބަރުންގެ މުސާރަ ކުޑަކުރަން ގޮވަނީ ރައްޔިތުން އިތުރަށް ނިކަމެތިކުރުމުގެ މަކަރުވެރި ނިޔަތުގައިކަމަށް އައްބާސް ވިދާޅުވިއެވެ.
އައްބާސް ވިދާޅުވީ މެމްބަރުންނަށް މިހާރު ލިބޭ މުސާރައިން ދެކޮޅު ނުޖެހޭކަމަަށެވެ. އެގޮތުން ލިވިން އެލަވަންސް އަށްވުރެ އެޕާޓްމެންޓު ތަކުގެ ކުލިބޮޑުކަމަށާއި ދާއިރާގެ ރައްޔިތުންނަށް މަހަކު އެތައް ހާސްރުފިޔާއެއް ހަރަދުކުރަން ޖެހޭކަމަށެވެ. އައްބާސް ވިދާޅުވީ މިނިސްޓާރުންނާއި ސްޓޭޓް މިނިސްޓަރުންނާއި ކުންފުނިތަކުގެ ވެރިންގެ މުސާރަތައް މާބޮޑުކަމަށާއި އެހެންނަމަވެސް ރައްޔިތުން ކަމަކު ޖެހުމުން ގުޅަނީ މަޖިލިސް މެމްބަރުންނަށްކަމަށެވެ.
އޮންލައިންކޮށް ސޮއިކުރަން އިއްޔެ ފަށާފައިވާ ޕެޓިޝަންގައި ވަނީ ރައްޔިތުންގެ މަޖިލީހުގެ މެމްބަރުންނަށް ލިބޭ މުސާރައާއި ކޮމެޓީ އެލަވަންސްތަކާއި ޕްރިމިއަމް ހެލްތް އިންޝުއަރެންސް އިނާޔަތްތަކުގެ ސަބަބުން އިގްތިސާދަށް މާލީ ގޮތުން މާބޮޑު ބުރައެއް އުފަލަންޖެހޭތީ ކަންބޮޑުވާކަމަށެވެ.
