
އެމަނިކުފާނު މިހެން ވިދާޅުވީ "ރައްޔިތުންނާ އެކު" މި ނަމުގައި ރައީސް ކުރިއަށްގެންދަވާ ޕޮޑްކާސްޓުގެ ދެވަނަ އެޕިސޯޑްގައި ވާހަކަ ދައްކަވަމުންނެވެ.
ރައީސް މުއިއްޒު ވިދާޅުވީ ސަރުކާރުން އަލުން ސަލްޓަން ޕާކު ހަދާއިރު ކުރިއަށްވުރެ ގިނަ ކަންކަން އެ ޕާކުގައި ހުންނާނެކަމަށެވެ. އެގޮތުން އެތަނުގައި ގިނަ ހަރަކާތްތައް ހިންގާނެ ގޮތަށް ހުންނާނެކަމަށް ރައީސް މުއިއްޒު ވިދާޅުވިއެވެ.
ސަލްޓަން ޕާކު އަލުން ތަރައްގީވެ ނިމޭއިރު އެތަން ވާނީ އެތަނަށްދާ ކުޑަކުދިންގެ އިތުރުން ޒުވާނުންނާއި، ބޮޑެތި މީހުންނާ، ހުރިހާ އެންމެންނަށްވެސް ބޭނުންކުރެވޭ ކަހަލަ ކަންތައްތައް ހިމެނޭނެ. ހިމެނޭނެކަމަށެވެ. އެގޮތުން އެތަން ވާނީ އެޑްވެންޗާ ޕާކަކަށްކަމަށްވެސް ރައީސް ވިދާޅުވިއެވެ.
މާލޭ ސިޓީ ކައުންސިލްގެ ބެލުމުގެ ދަށުގައިވާ ސަލްޓަން ޕާކު މަރާމާތުކުރުމުގައި ސަރުކާރާއި ސިޓީ ކައުންސިލާއި ދެމެދު ވަނީ ކޯޅުމަކަށް އައިސްފައެވެ. ސަލްޓަންފާކު ހުޅުވިފަހުން މިހާތަނަށް އެތަނުގެ އެއްވެސް މަރާމާތެއް ނުކުރާކަމަށާއި ހުރީ މުޅިން ހަލާކުވެފައިކަަމަށް މާލޭ ސިޓީ ކައުންސިލުން ވަނީ ބުނެފައެވެ. އަދި އެތަން ހަދާނެ ބަޔަކު ހޯދުމަށް އެ ކައުންސިލުން ވަނީ އިއުލާންވެސް ކޮށްފައެވެ.
ސިޓީ ކައުންސިލުން ބުނީ ސަލްޓަން ޕާކު ހަދާ ވާހަކަ ސަރުކާރުން އިއުލާންކުރީ އެ މަސައްކަތް އެ ކައުންސިލުން ކުރަމުން އަންނަނިކޮށްކަމަށެވެެ.
ސަލްޓަން ޕާކަށް ބޮޑެތި ބަދަލުތަކެއް ގެނެސް އެތަން އަލުން ހުޅުވީ 2016 ވަނަ އަހަރު ރައީސް އަބްދުﷲ ޔާމީންގެ ވެރިކަމުގައެވެ.