
އޭއާރު މުރުގަދޯސް ޑައިރެކްޓްކުރި މި ފިލްމަކީ އީދާ ދިމާކޮށް ރިލީޒްކުރި ފިލްމެއް ނަމަވެސް، ފިލްމުގެ ދެ ވަނަ ދުވަހު ލިބުނު އާމްދަނީއަކީ 36.50 ކަރޯޑު ރުޕީޒް ކަމަށްވާއިރު، މިއީ ފުރަތަމަ ދުވަހާ އަޅާބަލާއިރު އެންމެ 6-13 ޕަސަންޓުގެ ކުރިއެރުމެއްކަން ފާހަގަކުރެވެއެވެ.
ފިލްމުގެ ދެ ދުވަހުގެ ޖުމްލަ އާމްދަނީ 62-64 ކަރޯޑު ރުޕީޒްއަށް އަރާފައިވާއިރު، މިއީ 2025 ވަނަ އަހަރު ބޮލީވުޑްގެ ތިން ވަނައަށް އެންމެ މަތީ އާމްދަނީ ހޯދި ފިލްމެވެ. ނަމަވެސް، ވިކީ ކައުޝަލްގެ "ޗާވާ" އާ އަޅާބަލާއިރު "ސިކަންދަރު" އޮތީ ފަހަތުގައެވެ. އީދު ދުވަހާ ދިމާކޮށް ރިލީޒްކުރި ފިލްމަކަށްވެފައި، ސަލްމާން ހާންގެ ފޭން ބޭސް އަށް ބަލާއިރު ދެ ވަނަ ދުވަހު މާބޮޑު ކުރިއެރުމެއް ލިބޭނެކަމަށް އިންޑަސްޓްރީގެ ތަހުލީލުކުރާ ފަރާތްތަކުން އުންމީދުކުރި ނަމަވެސް، ލިބުނު ކުރިއެރުން ކުޑަކަން ފާހަގަކުރެވެއެވެ.
ފިލްމާ ދޭތެރޭ މީހުންގެ ހިޔާލު ތަފާތުވުމަކީ ފިލްމުގެ ކުރިއެރުމަށް ހުރަސްއެޅޭ އެއް ސަބަބުކަމަށް ބެލެވެއެވެ. ބައެއް މީހުން ސަލްމާންގެ ވަރުގަދަ ޕާފޯމަންސްއާއި ފިލްމުގެ އެކްޝަން ސީންތަކަށް ތައުރީފުކުރާއިރު، އަނެއްބައި މީހުން ފިލްމުގެ ވާހަކަ އާދައިގެ ގޮތަށް ހުރުމާއި އިހުސާސްތަކުގެ ފުންމިން ނެތްކަމަށް ބުނެ ފާޑުކިޔާފައިވެއެވެ.
"ސިކަންދަރ" އަކީ ސަލްމާން ހާން އާއި "ގަޖިނީ" އަދި "ހޮލިޑޭ" ފަދަ ބްލޮކްބަސްޓަރާ ފިލްމުތައް ހަދާފައިވާ ޑައިރެކްޓަރު އޭއާރު މުރުގަދޯސްގެ ފުރަތަމަ ކޮލަބޮރޭޝަނެވެ. ވަރުގަދަ ސަޕޯޓިން ކާސްޓަކާއި ބޮޑު ބަޖެޓަކާއެކު ތައްޔާރުކުރި މި ފިލްމު ބޮކްސް އޮފީހުގައި ވަރަށް ރަނގަޅަށް ކުރިއަށްދާނެކަމަށް ބެލެވުނު ނަމަވެސް، މިހާރުގެ ހާލަތުން ދައްކާގޮތުގައި ކުރިއަށް އޮތް ދުވަސްތަކުގައި ފިލްމަށް ކުރިއެރުމެއް ލިބޭނެ މިންވަރާ މެދު ސުވާލު އުފެދިފައިވެއެވެ.