އިނގިރޭސި ވިލާތުގެ ފޮރިން އޮފީހުން ނެރުނު ދަތުރުފަތުރާ ބެހޭ އިރުޝާދުގައި ރާއްޖެއަށް ދަތުރުކުރާ އެ ގައުމުގެ ރައްޔިތުންނަށް ސަމާލުވުމަށް އަންގާފައިވެއެވެ.
އިނގިރޭސި ވިލާތުގެ ފޮރިން އޮފީހުން ބުނީ 2017 ވަނަ އަހަރުން ފެށިގެން ރާއްޖޭގައި ޓެރަރިޒަމްގެ ހަމަލާތަކުގެ ރޭވުންތައް ހުއްޓުވާލެވިފައިވާ ކަމަށާއި، ހަމަލާ ރޭވުމާއި، ޓެރަރިސްޓް ހަނގުރާމަވެރިން ރެކްރޫޓްކުރުމާއި، ހަރުކަށި ފިކުރު ފެތުރުމާ ގުޅިގެން ގިނަ ބަޔަކު ހައްޔަރުކުރެވިފައިވާ ކަމަށެވެ. ނަމަވެސް، ޓެރަރިޒަމްގެ ނުރައްކާ އަދިވެސް އޮތްކަމަށް އެ އޮފީހުން ވަނީ ފާހަގަކޮށްފައެވެ.
ފާއިތުވި 5 އަހަރުގެ ތެރޭގައި ރާއްޖޭގައި ހިނގާފައިވާ ހަމަލާތަކުގެ ތެރޭގައި 2022 ވަނަ އަހަރު ހުޅުމާލޭގައި ސިޔާސީ ފަރާތަކަށް ތޫނު އެއްޗަކުން ހަމަލާދިނުމާއި، 2021 ވަނަ އަހަރު މާލޭގައި އައިއީޑީއެއް ގޮއްވާލައިގެން ސިޔާސީ ފަރާތަކާއި އާންމުންނަށް ގެއްލުން ދިނުމާއި، 2020 ވަނަ އަހަރު ލ. ގަމުގައި ފުލުހުންގެ ސްޕީޑް ބޯޓަކަށް އަލިފާން ޖެހުމާއި، ހަމަ އެ އަހަރު ހުޅުމާލޭގައި ތިން ބިދޭސީއަކަށް ތޫނު އެއްޗަކުން ހަމަލާދިނުން ހިމެނޭކަމަށް އިނގިރޭސި ވިލާތުގެ ފޮރިން އޮފީހުން ފާހަގަކޮށްފައިވެއެވެ.
އިސްރާއީލާއި ފަލަސްތީނުގެ މެދުގައި މިހާރު ހިނގަމުންދާ ހަނގުރާމައިގެ ސަބަބުން ދުނިޔޭގެ އެކި ކަންކޮޅުތަކުގައި ހަމަނުޖެހުން އިތުރުވެފައިވާ ކަމަށާއި، އަލްގައިދާ އަދި ދާއިޝް ފަދަ ޓެރަރިސްޓް ޖަމާއަތްތަކުން އެމީހުންގެ ތާއީދުކުރާ ފަރާތްތަކަށް ޓެރަރިސްޓް ހަމަލާތައް ދިނުމަށް ގޮވާލާފައިވާ ކަމަށް އިނގިރޭސި ވިލާތުގެ ފޮރިން އޮފީހުން ބުނެފައިވެއެވެ.
މި ހަނގުރާމައިގެ ސަބަބުން ރާއްޖޭގައިވެސް ޓެރަރިސްޓް ހަމަލާތައް ދިނުމަށް ބަޔަކު ހިތްވަރު ލިބިގަނެފާނެކަމުގެ ބިރު އޮތްކަމަށްވެސް އެ ފަރާތުން ވަނީ ފާހަގަކޮށްފައެވެ.
