
ރައީސް މުއިއްޒު މި ޒިޔާރަތް ކުރެއްވީ ލިވަޕޫލް އެފްސީ އާއި އެވަޓަން އާ ދެމެދު ކުޅުނު މާސައިޑް ޑާބީ މެޗަށް ތައްޔާރުވަމުންދިޔަ ވަގުތެއްގައެވެ.
ރައީސް އޮފީހުން ބުނީ ރައީސް މުއިއްޒު އެންފީލްޑް ސްޓޭޑިއަމްގެ ހާއްސަ ޓުއާއެއް ހެއްދެވިކަމަށެވެ. މި ޓުއާގައި ރައީސް ދަނޑުގެ އެކި ސަރަހައްދުތަކަށް ޒިޔާރަތްކުރެއްވިއެވެ. އަދި ދަނޑުގެ ކައިރީގައި ހުރި ލިވަޕޫލް ކުޅުންތެރިންގެ ޖާޒީތައް ބެއްލެވުމުގެ އިތުރުން ކުޅުންތެރިން ތައްޔާރުވާ ސަރަހައްދުތަކަށްވެސް ޒިޔާރަތްކުރެއްވިއެވެ.
ރައީސް މުއިއްޒުގެ މި ޒިޔާރަތަކީ ރާއްޖޭގެ ޓޫރިޒަމް ޕްރޮމޯޓްކުރުމަށް ކުރައްވާ މަސައްކަތުގެ ބައެއްކަން ފާހަގަކުރެވެއެވެ. ލިވަޕޫލް އެފްސީއަކީ ދުނިޔޭގެ އެންމެ މަޝްހޫރު ފުޓްބޯޅަ ކުލަބުތަކުގެ ތެރެއިން އެއް ކުލަބުކަމަށްވާއިރު، މި ޒިޔާރަތުން ރާއްޖެއަށް ބޮޑު ޕްރޮމޯޝަނެއް ލިބިގެންދާނެކަމަށް ބެލެވެއެވެ.
ރައީސް މުއިއްޒުގެ މި ޒިޔާރަތުގައި ލިވަޕޫލް އެފްސީގެ އިސްވެރިންނާ ބައްދަލުކުރައްވައި، ދަނޑުގެ ޕިޗްސައިޑްގައި ފޮޓޯ ނަންގަވާފައިވެއެވެ. އަދި ލިވަޕޫލް އެފްސީގެ ނަންބަރު 25 ޖާޒީއެއް ރައީސް މުއިއްޒަށް ހަދިޔާކޮށްފައިވާކަންވެސް ފޮޓޯތަކުން ފެންނަން އެބަހުއްޓެވެ. ރައީސް މުއިއްޒު މިހާރު ހުންނެވީ ރަސްމީ ދަތުރުފުޅެއްގައި އިނގިރޭސި ވިލާތުގައެވެ.