އެމެރިކާއަށް އެތެރެކުރާ މުދަލުން ޓެރިފް ބޮޑުކުރާ 60 ގައުމުގެ ލިސްޓު އެ ގައުމުގެ ރައީސް ޑޮނަލްޑް ޓްރަމްޕް ރޭ ވަނީ އިއުލާން ކުރައްވާފައެވެ.
ވައިޓް ހައުސްގެ ރޯސް ގާޑަންގައި ބޭއްވި ރަސްމިއްޔާތުގައި އެ ލިސްޓު އާއްމުކުރެއްވުމަށްފަހު ޓްރަމްޕް ވަނީ އެކަން ތަންފީޒުކުރާ އަމުރުގައި ސޮއިކުރައްވާފައެވެ. އެ އަމުރުގައި ވާގޮތުން އާ ޓެރިފަށް މި މަހުގެ 5 އިން ފެށިގެން އަމަލު ކުރަން ފަށާނެއެވެ.
އެމެރިކާއަށް އެތެރެކުރާ މުދަލުން ޓެރިފް ބޮޑުކުރި ގައުމުތަކުގެ ތެރޭގަައި ރާއްޖެވެސް ހިމެނެއެވެ. މިގޮތުން ރާއްޖެއިން އެ ގައުމަށް އެތެރެކުރާ މުދަލުން 10 ޕަސެންޓުގެ ޓެރިފެއް ނަގަން ވަނީ ނިންމާފައެވެ.
ރާއްޖެއިން މައިގަނޑު ގޮތެއްގައި އެމެރިކާއަށް އެކްސްޕޯޓު ކުރަނީ މަހުގެ ބާވަތްތަކެވެ. އެމެރިކާއިން ނެރެފައިވާ ތަފާސް ހިސާބުތަކަށް ބަލާއިރު 2022 ވަނަ އަހަރު ރާއްޖެއިން ވަނީ އެ ގައުމަށް 17 މިލިއަން ޑޮލަރުގެ މުދާ އެތެރެކޮށްފައެވެ.
ޓެރިފް ބޮޑުކުރިކަން އިއުލާން ކުރައްވަމުން ޓްރަމްޕް ވިދާޅުވީ މީ އެ ގައުމުގެ ތާރީހުގައި ފާހަގަކޮށްލެވޭނެ ދުވަހަކަށް ވާނެ ކަމަށެވެ. އަދި މީ ގައުމަށް އައު އުއްމީދުތަކެއް ގެނެސް އަމިއްލަ ފައިމައްޗަށް ތެދުވާން ލިބުނު ފުރުސަތެއްކަމަށްވެސް ޓްރަމްޕް ވިދާޅުވިއެވެ.
އަދި މިކަމުގެ ނަތީޖާއަކަށް ވެގެންދާނީ އެ ގައުމުތަކުގެ ކުންފުނިތަކުގެ މަސައްކަތްތައް އެމެރިކާއަށް އައުން ކަމަށެވެ. އޭގެ ސަބަބުން އެމެރިކާގައި ކުރެވޭ އިންވެސްޓްމަންޓްތައް އިތުރުވެ ވަޒީފާގެ އެތައް ފުރުސަތުތަކެއް ވެސް ފަހިވާނެކަމަށް ޓްރަމްޕް ވިދާޅުވިއެވެ.
