މި ރޯދަ މަހު ސަރުކާރުން ދޭ ހަދިޔާއެއްގެ ގޮތުގައި ކަރަންޓް ބިލާއި ފެން ބިލުން 10 އިންސައްތައިގެ ޑިސްކައުންޓެއް ދިނުމަށް ވަނީ ނިންމާފަ އެވެ.
ރޯދަ މަސް ނިމި ކަރަންޓް ބިލްތައް ލިބެން ފެށުމުން ބިލްތައް ބޮޑުކަމަށް ބުނެ ބައެއް ފަރާތަތަކުން އަންނަނީ އެކަމުގެ ޝަކުވާތައް ސޯޝަލް މީޑިއާގައި ހިއްސާކުރަމުންނެވެ. އެގޮތުން ބައެއް ބިލްތައް ދެގުނަ ބޮޑުވެފައިވާކަމަށްވެސް ބައެއް ފަރާތްތަކުން ބުނެެ އެވެ.
މިކަމާއި ގުޅިގެން "ސީއެމްއެމް" އާއި ވާހަކަ ދައްކަވަމުން ސްޓެލްކޯގެ މީޑިއާ އޮފިޝަލު ވިދާޅުވީ ކަރަންޓް ބިލްތައް ބޮޑީ ރޯދަ މަހާއި ހޫނު މޫސުމާއި ދިމާވުމުންކަމަށެވެ. އެގޮތުން މިދިޔަ އަހަރަށްވުރެ މި އަހަރު ޕީކް ކުޑަވި ނަމަވެސް ކަރަންޓް ބޭނުންކުރު ޔޫސޭޖް (ބޭނުންކުރި މިންވަރު) މައްޗަށް ގޮސްފައިވާކަމަށެވެ.
އެގޮތުން ރޯދަމަހަކީ އާއްމުކޮށް ކަރަންޓް ބޭނުންކުރާ މިންވަރު މައްޗަށް ދާ މަހެއްކަމަށާއި މި ރޯދަމަހުވެސް އެއްދުވަހުން އަނެއް ދުވަހަށް ކަރަންޓް ބޭނުންކުރި މިންވަރު އިތުރުވެފައިވާކަން އޭނާ ފާހަގަކުރެއްވި އެވެ. އަދި މި ރޯދަމަހުގެ ކަރަންޓް ބިލްތައް މިދިޔަ އަހަރުގެ ރޯދައަށްވުރެ ދަށްކަންވެސް ސްޓެލްކޯއިން ފާހަގަކުރެ އެވެ.
މީޑިއާ އޮފިޝަލް ވިދާޅުވީ ކަރަންޓްގެ ޑިސްކައުންޓް އެކި ބިލްތަކުން އެކި ވަރަށް ފެންނަނީ ޑިސްކައުންޓް ދިނުމުގައި ބަލާފައިވަނީ މިދިޔަ ނުވަމަހުގެ ބިލްތަކުގެ އެވެރެޖަށްކަމަށެވެ. އަދި މިދިޔަ ނުވަމަހު ގެ އެވެރެޖް ބެލެން ނެތްތަންތާފައި ދިނީ 10 އިންސައްތައިގެ ފްލެޓް ޑިސްކައުންޓެއްކަމަށްވެސް އޭނާ ވިދާޅުވި އެވެ.
މި ރޯދަމަހު ކަރަންޓަށްދޭ ޑިސްކައުންޓަށް ގާތްގަނޑަކަށް 160 މިލިއަން ރުފިޔާ އަރާނެކަމަށް ސްޓެލްކޯއިން ވަނީ އަންދާޒާ ކޮށްފަ އެވެ.
