ރޭ "ހޮޅުދޫ ބޯޓު" ގައި ހިނގި އަލިފާނުގެ ހާދިސާގައި ގެއްލިގެން ހޯދަމުން އަންނަނީ ލ. މާވަށަށް ނިސްބަތްވާ އުމުރުން 25 އަހަރުގެ އަލީ މުޝްފިގް މުހައްމަދުއެވެ. އޭނާގެ އެއްވެސް ހަބަރެއް މިހާތަނަށް ލިބިފައި ނުވާކަމަށް އެމްއެންޑީއެފުން ބުނެއެވެ.
އެ އިދާރާއިން ބުނީ މުސްފިގް ހޯދުމަށް ކަނޑާއި ވައިގެ މަގުން މަސައްކަތް ކުރަމުން އަންނަކަމަށެވެ. އެގޮތުން އެމްއެންޑީއެފްގެ ކޯސްޓްގާޑް ޝިޕް ގާޒީ އާއި އެފްއައިސީ މާފަތް އަދި އެޗްޕީ 114 ބޭނުންކުރަމުން އަންނަކަމަށެވެ. މީގެއިތުރުން އެއާ ކޯގެ ޑްރޯންވެސް އަރުވަމުން އަންނަކަމަށާއި ސެންޓްރަލް އޭރިއާ ކޮމާންޑްގެ ޑައިވަރުންވެސް ޑައިވްކުރަމުން އަންނަކަމަށްވެސް އެމްއެންޑީއެފުން ބުނެއެވެ.
18 މީހުންނާއި އެކު ތ. ހިރިލަންދޫއިން މާލެއަށް ދަތުރުކުރަމުން ދިޔަ "ހޮޅުދޫ ބޯޓު"ގައި ރޭ އިރާކޮޅު ރޯވީ ތ. ކަނޑޫދޫ ކައިރިން ދަތުރުކުރަމުން ދަނިކޮށެވެ. ބޯޓުގައި ރޯވެ ބިދޭސީއަކާއި ދިވެއްސަކު ފިހި އެ ދެމީހުންނަށް އަންނަނީ ފަރުވާ ދެމުންނެވެ. އެ ދެމީހުންނަށް ކަނޑޫދޫ ސިއްހީ މަރުކަޒުހައި ފަރުވާދިނުމަށް ފަހު ރޭ ދަންވަރު ވަނީ ކުޑަ ހުވަދޫއަށް ބަދަލުކޮށްފައެވެ.
"ހޮޅުދޫ ބޯޓު" ގައި އަލިފާން ރޯވެ އެ ބޯޓު އަނދާ ހުލިވެ ރޭ ދަންވަރު 02:07 ހާއިރު ބޯޓު ވަނީ އަޑިއަށް ގޮސްފައެވެ.
