
18 މީހުންނާއި އެކު ތ. ހިރިލަންދޫއިން މާލެއަށް ދަތުރުކުރަމުން ދިޔަ "ހޮޅުދޫ ބޯޓު"ގައި ރޭ އިރާކޮޅު ރޯވީ ތ. ކަނޑޫދޫ ކައިރިން ދަތުރުކުރަމުން ދަނިކޮށެވެ.
މި ހާސިދާގައި މާވަށް ނިސްބަތްވާ އުމުރުން 25 އަހަރުގެ އަލީ މުޝްފިގް ފިޔަވާ އެންމެން ވަނީ ސަލާމަތްކުރެވިފައެވެ. މުޝްފިގު ގެއްލި އެ ޒުވާނާ ހޯދުމުގެ މަސައްކަތް އަންނަނީ ކުރަމުންނެވެ.
މާވަށު މީހުން ބުނާގޮތުން ރޭ މުޝްފިގު މާލެ ދަތުކުރަމުން އައީ އޭނާގެ ކޮއްކޮއާއި އެކުއެވެ. ރޭ 21:07 ހާއިރު ބޯޓުގައި ރޯވި އަލިފާންގަނޑު ކުޑައިރުކޮޅެެގެ ތެރޭގައި މުޅި ބޯޓްގައި ހިފުމުން އެންމެން ކަނޑަށް ފުންމާލަން މަޖްުބޫރުވިއެވެ.
އަލިފާން ރޯވުމުން މުޝްފިގާއި އޭނާގެ ކޮއްކޮ ދެ ބެއިން އެކުގައި ކަނޑަށް ފުންމާލީކަމަށް އެރަށު މީހުން ބުނެއެވެ. ދެ މީހުން ދެ ލައިފްޖެކެޓް ނެގި ނަމަވެސް އެންމެން ބިރުން މޫދަށް ފުންމާލި ވަގުތު ބޯޓުން ފުންމާލި މީހަކު މުޝްފިގުގެ އަތުގައި އޮތް ލައިފްޖެކެޓް ނެގުމުން ދެބެން މޫދަށް ފުންމާލީ އެންމެ ލައިފްޖެކެޓެއް ހިފައިގެންނެވެ. ދެބެން ފުންމާލީ އެކަކު އަނެކަކުގެ އަތުގައި ހިފައިގެންކަމަށް އެރަށުން ވާހަކަ ދެއްކި މީހަކު ބުންޏެވެ.
ބޭބެއަށް އެހާ ރަނގަޅަށް ފަތަން ނޭގޭތީ ކޮއްކޮގެ އަތުގައި ހިފަހައްޓައިގެން އޮއްވާ ގެއްލުނީ ރާޅާއެކު ރޯވި ބޯޓު ގަޔާ ދިމާލަށް އަންނަން ފެށުމުން އެއިން ސަލާމަތްވާން މަސައްކަތް ކުރަނިކޮށްކަމަށް މާވަށު މީހުން ބުނެއެވެ. އޭގެ ފަހުން ބޭބެ މުޝްފިގުގެ އެއްވެސް ހަބަރެއް ނެތްކަމަށް އޭނާގެ ކޮއްކޮ ކިޔާދިންކަމަށް ރަށު މީހުން ބުނެއެވެ.
މާވަށު ރައްޔިތުން ބުނާ ގޮތުގައި މުޝްފުގަކީ އެންމެނާއި ގުޅޭ ހިތްހޮޔޮ ޒުވާނަކެވެ. އަދި އޭނާ ނުދަންނަ މީހަކު ރަށުގައި ނުހުންނާނެކަމަށްވެސް އެރަށުން ވާހަކަ ދެއްކި މީހުން ބުނެއެވެ. މުޝްފިގު ބައްޕައަކީ އެ ރަށު ބޮޑު މިސްކިތު އިމާމެވެ. މުޝްފިގަކީވެސް ތަޖުވީދަށް ރީތިކޮށް ގުރުއާން ކިޔަވާ، ރަށުގެ މިސްކިތްތަކުގައި ވަރަށް ގިނައިން އިމާމުވެ ނަމާދުވެސް ކުރާ ޒުވާނެއްކަމަށް އެރަށު މީހުން ބުނެއެވެ.
މާވަށު މީހުން ސިފަކުރަނީ މުޝްފިގަކީ އެއީ މާވަށުގެ ޖަވާހިރެއްކަމަށެވެ. ރަށަށް ގެއްލިގެން އެ ދިޔައީ ރަށުގެ އެންމެންގެ ލޯބި ލިބިފައިވާ ނަމޫނާ ޒުވާނެކެވެ.
އެމްއެންޑީއެފުން އަންނަނީ މުސްފިގް ހޯދުމަށް ކަނޑާއި ވައިގެ މަގުން މަސައްކަތް ކުރަމުންނެވެ. އެގޮތުން އެމްއެންޑީއެފްގެ ކޯސްޓްގާޑް ޝިޕް ގާޒީ އާއި އެފްއައިސީ މާފަތް އަދި އެޗްޕީ 114 ބޭނުންކުރަމުން އަންނަކަމަށް އެ އިދާރާއިން ބުނެއެވެ. މީގެއިތުރުން އެއާ ކޯގެ ޑްރޯންވެސް އަރުވަމުން އަންނަކަމަށާއި ސެންޓްރަލް އޭރިއާ ކޮމާންޑްގެ ޑައިވަރުންވެސް ޑައިވްކުރަމުން އަންނަކަމަށްވެސް އެމްއެންޑީއެފުން ބުނެއެވެ.