މިއަހަރު ހުރިހާ އަތޮޅެއްގައި އައިޑީ ކާޑާއި ޕާސްޕޯޓު ހެދުމުގެ ހިދުމަތް ފެށުމަށް ސަރުކާރުން ނިންމާ އެ ޕްރޮގްރާމް އިފްތިތާހުކުރީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ.
މި ޕްރޮގްރާމްގެ ދަށުން ދިވެހި ރައްޔިތުން ކާޑް ޕްރިންޓްކޮށް ދޫކުރަން ފުރަތަމަ ފެށީ ގއ. ވިލިގިނލީގައެވެ. އެއީ ދިވެހި ރައްޔިތެއްކަން އަންގައިދޭ އައިޑީކާޑު މާލެ ފިޔަވައި އެހެން ރަށެއްގައި ޕްރިންޓްކުރަން ފެށީ ފުރަތަމަ ފަހަރެވެ.
މި ޕްރޮގްރާމްގެ ދަށުން ގދ ގައްދޫގައި އައިޑީކާޑް ޕްރިންޓްކޮށް ދޫކުރުމުގެ ހިދުމަތް އިއްޔެ ފަށާފައެވެ. މި ހިދުމަތާއި އެކު ގައްދޫ ރައްޔިތުން މާލެ ނައިސް މިހާރު ރަށުގައި ތިބެ އައީޑީކާޑަށް އެދި އައީޑީކާޑު ނެގުމުގެ ފުރުސަތު ލިބޭނެއެވެ. ގައްދޫއަކީ ގދ އަތޮޅުގެ ވެރިކަންކުރާ ރަށް ފިޔަވައި މި ހިދުމަތް ޤާއިމުކުރި ފުރަތަމަ ރަށެވެ. އެ އަތޮޅުގައި ވެރިކަންކުރާ ގދ. ތިނަދޫގައި އައިޑީ ކާޑު ޕްރިންޓް ކުރުމުގެ ހިދުމަތް މީގެ ކުރިން ވަނީ ފަށާފައެވެ.
ގައްދޫގައި މި ހިދުމަތް ފެށުމުން ވެރިރަށް މާލެ ފިޔަވާ ރާއްޖޭގެ 15 ރަށަކުން އައިޑީކާޑް ޕްރިންޓްކޮށް ދޫކުރުމުގެ ހިދުމަތް މިހާރު ލިބޭނެކަަމަށް ޑިޕާޓްމެންޓް އޮފް ނޭޝަނަލް ރެޖިސްޓްރޭޝަނުން ބުނެއެވެ.
