ޖަޕާނުގެ ކުންފުންޏަކާއި ދިވެހި އަމިއްލަ ކުންފުންޏެއް ގުޅިގެން އެޅި މި ފެކްޓަރީ ހުޅުވާފައިވަނީ ހއ. ދިއްދޫގަ އެވެ.
އެރަށުން 15000 އަކަފޫޓްގެ ބިމެއް ކުއްޔަށް ނަގައިގެން މި މަސައްކަތް ފަށާފައިވާ ދިވެހި ކުންފުންޏަކީ އެމް.ޑީޕް އިންވެސްޓްމަންޓްއެވެ. މި މަސައްކަތަށް ކައުންސިލުން ވަނީ 15 އަހަރަށް ބިމެއް އެ ކުންފުންޏަށް ކުއްޔަށް ދޫކޮށްފައެވެ.
ދިއްދޫގައި ލޮނު ފެކްޓަރީ ހުޅުވާ އިއްޔެ ވަނީ އެ ފެކްޓަރީގައި ލޮނު އުފައްދަންވެސް ފަށާފައެވެ.
އެމް.ޑީޕް އިންވެސްޓްމަންޓް ބުނީ ރާއްޖޭގައި ލޮނު އުފައްދަން ފަށާފައި މިވަނީ ރާއްޖޭގެ ކަނޑުގެ ލޮނުގެ ކޮލިޓީ ޖަޕާނުގައި ޓެސްޓުކުރުމަށްފަހުކަމަށެވެ. އަދި މި ޓެސްޓަކުގެ ނަތީޖާތަކުން ދެއްކީ އެހެން ގައުމުތަކުގެ ކަނޑުގެ ލޮނާ ތަފާތުކޮށް ރާއްޖޭގެ ކަނޑުގެ ލޮނަކީ ކޮލިޓީ ރަނގަޅު އަދި ސިއްހަތަށް ފައިދާހުރި މާއްދާތަކުގެ މިންވަރުވެސް މަތި ލޮނެއްކަމަށް އެ ކުންފުނިން ބުނެއެވެ.
ދިއްދޫ ލޮނު ފެކްޓަރީ
މި ފެކްޓަރީން ތިން ބާވަތެއްގެ ލޮނު އުފެއްދުމަށްވަނީ ނިންމައިފައެވެ. އޭގެ ތެރޭގައި ކެއިންބިއުމުގައި ބޭނުންކުރާ ލޮނާއި، ބައެއް ހާއްސަ ބާވަތްތަކުގެ އިތުރުން، ލޮނު މަސް ތައްޔާރު ކުރުމަށް ބޭނުންކުރާ ލޮނުވެސް އުފައްދާނެކަމަށް އެ ކުންފުނިން ބުނެއެވެ.
"ޓެންޕީ ސަން ސޯލްޓް" ގެ ނަމުގައި މި ކުންފުނިން އުފައްދާ ލޮނު ބޭރުކުރުމަށް ނިންމާފައިވަނީ ރާއްޖޭގެ ރިސޯޓްތަކށާއި ޖަޕާނަށްކަމަށްވެސް އެ ކުންފުނިން ވަނީ ބުނެފައެވެ.
މި ލޮނު ފެކްޓަރީގެ ސަބަބުން ދިއްދޫގައި ވަޒީފާ އުފެފި ކައުންސިލަށްވެސް ރަނގަޅު އާމްދަނީއެއް ލިބޭނެކަމަށް އެ ރަށު ކައުންސިލުން ބުނެއެވެ. އެގޮތުން ކައުންސިލަށް އާމްދަނީގެ ގޮތުގައި އަހަރަކު ގާތްގަނޑަކަށް 144،000 ރުފިޔާ ލިބޭނެކަމަށް ކައުންސިލުން ބުނެ އެވެ.
