ޖޭއެސްސީއަށް ޝަހީދު އިއްޔެވަނީ އައްޔަން ކުރައްވާފައެވެ. ޖޭއެސްސީއަށް ޝަހީދު އައްޔަން ކުރެއްވީ، ސުޕްރީމް ކޯޓުން އެ ކޯޓު ތަމްސީލްކުރާ ޖޭއެސްސީގެ މެންބަރުގެ ގޮތުގައި ޝަހީދު އިންތިހާބު ކުރުމުންނެވެ. ޝަހީދުއަކީ މިދިޔަ މާރިޗު މަހު ސުޕްރީމް ކޯޓަށް އައްޔަން ކުރެއްވި ފަނޑިޔާރެކެވެ. ޝަހީދު ކުރިން ހުންނެވީ ހައިކޯޓުގެ އިސްފަނޑިޔާރުގެ މަގާމުގައެވެ.
ޝަހީދު ޖޭއެސްސީގައި މަސައްކަތް ކުރައްވަން ފެށްޓެވިއިރު، އެ ތަނުގައި މިފަހުން ފެށުނު ސުޕްރީމް ކޯޓުގެ ތިން ފަނޑިޔާރެއްގެ ތަހުގީގަކާ ގުޅިގެން ގިނަ ބައެއްގެ ފާޑު ކިޔުންވަނީ އެ ކޮމިޝަނަށް އަމާޒުވެފައެވެ. އެ ކޮމިޝަނުން މައްސަލަތަކެއް ބަލަމުންދާ ކަމަށް ބުނެ، ސުޕްރީމް ކޯޓުގެ ތިން ފަނޑިޔާރު ސަސްޕެންޑް ކުރިއެވެ. އޭގެ ތެރެއިން އެއް ފަނޑިޔާރު، މަގާމުން އިސްތިއުފާ ދެއްވާފައިވާއިރު، އަނެއް ދެ ފަނޑިޔާރުންގެ މައްސަލަ އަދިވެސް ދަނީ ކުރިއަށެވެ.
