މި ޕްލެޓްފޯމަކީ ދިވެހި ވިޔަފާރިވެރިންނަށް ލުއި ގޮތްތަކެއް މަގުފަހިކޮށްދެއްވުމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ގެންގުޅުއްވާ ތަސައްވުރުގެ ދަށުން، ފަރުމާކޮށްފައިވާ ޕްލެޓްފޯމެކެވެ.
މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނީ މިދިޔަ ފެބްރުއަރީ މަހުގެ 2 ވަނަ ދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައި ނިންމެވުމާ އެއްގޮތަށް، އިމްޕޯޓް އެކްސްޕޯޓާއި ގުޅުންހުރި އިދާރާތައް އެއް ވިއުގައަކުން ގުޅާލުމަށް އުފައްދާފައިވާ ޓްރޭޑިއަން ޕްލެޓްފޯމް އަންނަ އާދީއްތަ ދުވަހު ބޭނުން ކުރަން ފަށަން ނިންމާފައިވާ ކަމަށެވެ. އެމްޕީއެލްއިން ޓްރޭޑިއަން މެދުވެރިކޮށް ފޮރިން ވެސަލް ރަޖިސްޓްރީކުރުމާއި، ވެސަލް އެރައިވަލް އިންފޮމޭޝަން ހުށަހެޅުމާއި، ސީ ކާގޯ އިމްޕޯޓް މެނިފެސްޓް ހުށަހެޅުމުގެ ހިދުމަތްތައް ދޭނެއެވެ.
ކަސްޓަމްސްއިންވެސް އަންނަ އާދިއްތަ ދުވަހުން ފެށިގެން ޝިޕިން އޭޖެންޓުން ރަޖިސްޓްރީކުރުމާއި، ފޮރިން ގޮއިން ވެސަލް ރަޖިސްޓްރީކުރުމާއި، ފްރައިޓް ފޯވާޑަރުން ރަޖިސްޓްރީކުރުމާއި، ވެސަލް އެރައިވަލް އިންފޮމޭޝަން ހުށަހެޅުމާއި، ސީ ކާގޯ މެނިފެސްޓް ހުށަހެޅުމުގެ ހިދުމަތްތައް ޓްރޭޑިއަން މެދުވެރިކޮށް ދޭން ފަށާނެއެވެ. އަދި ޖޫން މަހުގެ 1 ވަނަ ދުވަހުން ފެށިގެން މި ހިދުމަތްތައް ފޯރުކޮށްދޭނީ ހަމައެކަނި ޓްރޭޑިއަން ޕްލެޓްފޯމް މެދުވެރިކޮށް ކަމަށް އެމްޕީއެލްއާއި ކަސްޓަމްސްއިން ބުނެފައިވެއެވެ. ޓްރޭޑިއަން ފަރުމާކޮށްފައިވަނީ އިގްތިސާދީ ދާއިރާގެ ފަރާތްތަކާއި ރާއްޖޭގެ ވިޔަފާރިވެރިންގެ ހިޔާލާއި މަޝްވަރާ ހޯދައިގެންނެވެ.
