މިއީ ދުނިޔޭގެ އެންމެ ބޮޑު ދެ އިގުތިސާދުގެ ދެމެދުގައި ކުރިން ފެށިފައިވާ ވިޔަފާރީގެ ހަނގުރާމަ އިތުރަށް ހަލަބޮލިކޮށްލިވި ފިޔަވަޅެކެވެ. ވައިޓް ހައުސްއިން އިއްޔެ ލަސްވަގުތެއްގައި މިކަން ކަށަވަރުކޮށްދިނެވެ. މިގޮތަށް ފިޔަވަޅު އެޅުމަށް ނިންމީ ޗައިނާއިން ކުރިން ތައާރަފުކޮށްފައިވާ 34 ޕަސަންޓުގެ ޓެރިފް އުވާލަން އިންކާރުކުރުމާ ގުޅިގެންނެވެ. މި ނިންމުމާއެކު ދުނިޔޭގެ މާކެޓުތަކަށް ބޮޑެތި އަސަރުތަކެއް ކުރަން ވަނީ ފަށައިފައެވެ.
އެމެރިކާގެ މި އާ ޓެރިފްތައް އަމާޒުކޮށްފައިވަނީ އިލެކްޓްރޯނިކްސް އަދި އިންޑަސްޓްރިއަލް އާލާތްތައް ފަދަ ޗައިނާއިން އެންމެ ގިނައިަން އެކްސްޕޯޓްކުރާ ބާވަތްތަކަކަށެވެ. މިކަމާ ގުޅިގެން ބެއިޖިންއިން ދިގު މުއްދަތެއްގެ ހަނގުރާމައަކަށް ތައްޔާރުވަމުންދާކަން ދައްކުވައިދޭ އިޝާރާތްތަކެއް ކޮށްފައިވެއެވެ. ޗައިނާގެ ދައުލަތުގެ މީޑިއާއިން ވަނީ ޗައިނާގެ ވިޔަފާރިތަކުގެ ކެރިފޯރުންތެރިކަން ފާހަގަކޮށް، ޗައިނާގެ މެނުފެކްޗަރަރުން ގެއްލުންވާނެކަމުގެ އިންޒާރު ދީފައެވެ. ގިނަ ކުންފުނިތަކުން މިހާރު ބޭރު މާކެޓުތަކަށް އެކްސްޕާންޑްވުމަށް ރާވަމުންދާކަން ފާހަގަކުރެވެއެވެ. މިއީ ދުނިޔޭގެ ސަޕްލައި ޗެއިންތައް އަލުން ބައްޓަންކުރުވައިފާނެ ބަދަލެކެވެ.
ޗައިނާގެ ކޮމާސް މިނިސްޓްރީން މި ޓެރިފްތައް "ރެކްލެސް އަދި ޝޯޓްސައިޓެޑް" ކަމަށް ބުނެ ކުށްވެރިކޮށްފައިވެއެވެ. އަދި އެ ގައުމުގެ މަސްލަހަތުތައް ހިމާޔަތްކުރުމަށް މަސައްކަތްކުރާނެކަމަށާއި އިތުރު ފިޔަވަޅުތަކެއް އަޅައިފާނެކަމުގެ ހިންޓެއް ދީފައިވެއެވެ. މި ދެމެދުގައި، އެމެރިކާގެ ކަސްޓަމަރުންނާއި ވިޔަފާރިތަކަށް މިހާރު ކުރިމަތިވެފައިވަނީ އަގުބޮޑުވުމާއި ސަޕްލައި ލައިންތަކަށް ދަތިތަކެއް ކުރިމަތިވުމުގެ ނުރައްކަލެވެ.
