ރާއްޖެޓީވީގެ ޕްރޮގްރާމެއްގައި ވާހަކަފުޅު ދައްކަވަމުން އަލީ ހުސެން ވިދާޅުވީ ރިޔާސީ އިންތިހާބަށްފަހު ޖެހިގެން މަޖިލިސް އިންތިހާބު ބޭއްވުމުން މިހާރު ފެންނަމުންދާ މައްސަލަތައް ދިމާވަނީ އެހެންވެގެންތޯ ބަލަންޖެހޭކަމަށެވެ.
އަލީ ހުސެން ވިދާޅުވީ ރިޔާސީ އިންތިހާބު ކާމިޔާބުކުރާ ބަޔަކު މަޖިލިސް މެޖޯރިޓީ ހޯދުމަށް ރައްޔިތުންގެ ކައިރީ އެދޭ މަންޒަރު ފެންނަމުންދާކަމަށެވެ. އެހެންނަމަވެސް ރައީސުލްޖުމްހޫރިއްޔާއަށް މަޖިލިސް މެޖޯރިޓީ ހިލޭ ތަބަކަކަށްލައިފައި ދިނުމުން ގައުމު އަނބުރާ ދެވުނީކަމަށް އަލީ ހުސެން ވިދާޅުވިއެވެ. އަދި މިކަމުން ދިވެހި ރައްޔިތުން ހިތި ތަޖުރިބާތަކެއް ކޮށްފައިވާކަމަށާއި މިއީ ރައްޔިތުން ވިސްނާލަންޖެހޭ ކަމެއްކަމަށްވެސް އަލީ ހުސެން ފާހަގަކުރެއްވިއެވެ.
މިހާރުވެސް ގާނޫނީ ގޮތުން ރައީސުލްޖުމްހޫރިއްޔާ މަޖިލިސް ކޮމިޓީއަކަށް ހާޒިރުކޮށް ސުވާލުކުރުމަށް ހުރަހެއް ނެތްކަމަށާއި، އެހެންނަމަވެސް އެކަން ނުކުރާކަމަށާއި އެގޮތުން ސަރުކާރާއި ރައީސުލްޖުމްހޫރިއްޔާ ޒިންމާދާރުކުރެވޭނެ ފުރުސަތެއް ނެތްކަމަށްވެސް އަލީ ހުސެން ފާހަގަކުރެއްވިއެވެ.
