އަރަބިއްޔާ ސްކޫލްގެ އާ އިމާރާތެއް އަޅާދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.
އަރަބިއްޔާ ސްކޫލް ޒަމާނީކޮށް، އަށް ބުރީގެ އިމާރާތެއްގެ ގޮތުގައި ތަރައްގީ ކުރުމަށް އެކަމުގެ އަމަލީ މަސައްކަތް ފެށީ މިދިޔަ އަހަރުގެ ނޮވެމްބަރު މަހުގެ 24 ވަނަދުވަހުއެވެ. މި މަސައްކަތް ހަވާލުކޮށްފައިވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑް (އާރްސީސީ) އެވެ.
"ރައްޔިތުންނާއި އެކު" ނަމުގައި ރައީސް މުއިއްޒު ކުރިޔަށް ގެންދަވާ ޕޮޑްކާސްޓްގެ ތިންވަނަ އެޕިސޯޑުގައި ވާހަކަ ދައްކަވަމުން އެމަނިކުފާނު ވިދާޅުވީ ވީ ވައުދާއި އެއްގޮތަށް އަރަބިއްޔާގެ މަސައްކަތް ފެށިފައިވާކަމަށެވެ. އަދި އަމާޒަކީ 2027ގެ ދިރާސީ އަހަރު އާ ސްކޫލްގައި ފެށުންކަމަށް ރައީސް މުއިއްޒު ވިދާޅުވިއެވެ.
އަރަބިއްޔާ ސްކޫލްގެ އާ އިމާރާތުގެ މަސައްކަތް ފެށުން
އަރަބިއްޔާ ސްކޫލުގެ އާ އިމާރާތް މީގެ ކުރިން ބިނާކުރުމަށް ހަމަޖެއްސީ ބާ ޖަމާލުއްދީނުގެ ބިމުގަ އެވެ. އެހެން ނަމަވެސް އަރަބިއްޔާ ސްކޫލުގެ ބެލެނިވެރިންގެ އެދުމާއެކު، ރައީސް ޑރ. މުހައްމަދު މުއިއްޒު ވަނީ އެ ސްކޫލް ބިނާކުރުމަށް ޖާގަ ތަނަވަސް ބިމެއް ކަމަށްވާ 386 ކޮށި ހަމަޖައްސަވައިދެއްވާފަ އެވެ.
މީގެ ކުރިން އެ މަސައްކަތް ކުރުމަށް ހަވާލު ކުރި ކުންފުންޏާއެކު ހަދާފައިވާ އެއްބަސްވުން ބާތިލްކޮށް، އާރްސީސީއާ އެ މަސައްކަތް ހަވާލުކޮށްފައިވަނީ 152،945ރ އަށް މި މަސައްކަތް 540 ދުވަހުގެ ތެރޭގައި ނިންމާ ގޮތަށެވެ.
މި ސްކޫލުގައި 40 ކްލާސްރޫމާއި، ބޭސްމެންޓްގައި އަންޑާ ގްރައުންޑް ޕާކިންގް ޒޯނަކާއި، ޓާފް ދަނޑެއް ހިމެނޭނެ އެވެ. މީގެ އިތުރުން މި ސްކޫލު އިމާރާތްކުރަނީ ޒަމާނީކޮށް، އޭސީ އަދި ސޯލާޕެނަލް ހަރުކުރެވޭނެ ގޮތަށެވެ.
