މާދަމާއިން ފެށިގެން ދ އަތޮޅުގެ ރައްޔިތުންނަށް އެ އަތޮޅު އުއްދޫއަށް ދަތުރު ދެވޭނެކަމަށް ލޯކަލް ގަވާމެންޓް މިނިސްޓްރީން ބުނެފިއެވެ.
Advertisement
ކުރިން އެގްރިކަލްޗަ މިނިސްޓްރީގެ ދަށުގައި އޮތް އުއްދޫ ދ. އަތޮޅު މީހުން ޕިކްނިކް ދާން ހާއްސަ ރަށެއްގެ ގޮތުގައި ކަނޑައެޅުއްވީ ރައީސް މުހައްމަދު މުއިއްޒުއެވެ. އެގޮތަށް ނިންމެވީ މިދިޔަ ފެބްރުއަރީގައި އެމަނިކުފާނު ދ. އަތޮޅަށް ކުރެއްވި ދަތުރުގައި އެ އަތޮޅު މީދޫއަށް ވަޑައިގެން ރައްޔިތުންނާ ބައްދަލުކުރައްވާ ވާހަކަ ދައްކަވަމުންނެވެ.
ލޯކަލް ގަވާމެންޓް މިނިސްޓަރު އާދަމް ޝަރީފު އުމަރު ވިދާޅުވީ މާދަމާއިން ފެށިގެން ހަފުތާ ބަންދު ދުވަސްތަކާއި ސަރުކާރު ބަންދު ދުވަސްތަކުގައި ދ. އަތޮޅުގެ ރައްޔިތުންނަށް ކުއްޔަކާ ނުލައި ދ. އުއްދޫއަށް ޕިކްްނިކް ދެވޭނެގޮތަށް ހަމަޖެހިފައިވާކަމަށެވެ.
އަދި އެކަމަށް ގުޅާނެ ނަމްބަރުތައްވެސް މިނިސްޓްރީން ވަނީ އާއްމުކޮށްފައެވެ. އުއްދޫގެ ޕިކްނިކު ދަތުރުގެ ކަންތަކާ ގުޅޭގޮތުން އިތުރު މަޢުލޫމާތު ހޯދަން ގުޅާނީ 9108899، 7777848 އަށެވެ.
މި ރަށް ބެލެހެއްޓުމަށް އެއީ މީދޫ އާދަމް ނަސީރު ވަނީ އައްޔަންކޮށްފައެވެ. އޭނާއާ އެ މަސައްކަތް ހަވާލުކޮށްފައިވަނީ ޑެޕިއުޓީ މިނިސްޓަރު ފެންވަރުގައެވެ.
