ރާއްޖޭގައި ވޭޕް މަނާކުރީ ރައީސް މުއިއްޒުގެ ދަރިކަލަކު ވޭޕް ބޭނުން ކުރެއްވުމުން ކަމަށް ބުނެ އިދިކޮޅު އެމްޑީޕީގެ މުޒާހަރާއެއްގައި އެ ޕާޓީގެ އެކްޓިވިސްޓު މަރިޔަމް ޒުބައިރު (މަންދީ) ދެއްކި ވާހަކަތައް ފުލުހުން އަންނަނީ ތަހުގީގުކުރަމުންނެވެ. އަދި އެ މައްސަލާގައި އޭނާގެ ޖިންސީ ގުނަވަން ފިޔަވާ ހުރިހާތަނެއްގެ ފޮޓޯ ނެގުމަށް ފުލުހުން މަސައްކަތް ކުރާކަމަށް ބުނުމުން ފުލުހުން މިއަދު ވަނޫ ނޫސްބަޔާނެއް ނެރެފައެވެ.
އެ ބަޔާނުގައި ބުނީ އެ މައްސަލައަކީ ޗިލްޑްރަންސް އޮމްބަޑްސްޕާސަންގެ އޮފީހުން ހުށައެޅުުމުން ތަހުގީގުކުރަމުން އަންނަ ޖިނާއީ މައްސަލައެއް ކަމަށެވެ. އެހެންނަމަވެސް ފުލުހުންގެ މި ވާހަކަތައް އޮމްބަޑްސްޕާސަންގެ އޮފީހުން ވަނީ ދޮގުކޮށްފަ އެވެ.
އެ އޮފީހުން މިރޭ ނެރުނު ބަޔާނެއްގައި ބުނީ ފުލުހުން ނެރުނު ބަޔާނުގައިވަނީ ސައްހަ މައުލޫމާތުތަކެއް ނޫންކަމަށެވެ. އެގޮތުން މުޒާހަރާގެ ވީޑިއޯ އެތަނުގެ ސަމާލުކަމަށް އައުމުން، އެ މައްސަލައިގައި ދެން އަމަލު ކުރަންވީ ގޮތާއި ޖިނާއީ ތަހުގީގެއް ކުރުމަށް އެދިފައި ނުވާނެކަމަށް އެ އޮމްބަޑްސްޕާސަންގެ އޮފީހުން ނެރުނު ބަޔާނުގައިވެ އެވެ. އަދި އެ އޮފީހުން އެދުނީ އެ ފަދަ ހަރަކާތްތަކުގައި ފުލުހުން އިންތިޒާމްވެ ތިބޭއިރު، ކުޑަކުދިންގެ ޒާތީ މައުލޫމާތު ހާމަކޮށް، ކުދިންގެ ކަރާމާތަށް އުނިކަން އަންނަ މައުލޫމާތު ހާމަ ނުކުރެވޭނެކަން ކަށަވަރު ކުރުމުގެ ގޮތުން ކުރަން ޖެހޭ ކަންކަން ކޮށްދިނުމަށް ކަމަށްވެސް އެ ބަޔާނުގައިވެ އެވެ.
އިދިކޮޅު އެމްޑީޕީގެ ގައުމީ މަޖިލީހުގެ މެމްބަރު އަހުމަދު ސަލީމް (މާޒް ސަލީމް) އާއި އެ ޕާޓީގެ އެކްޓިވިސްޓެއް ކަމަށްވާ މަރިޔަމް ޒުބައިރު (މަންދީ) ގެ ޖިންސީ ގުނަވަން ފިޔަވައި ހަށިގަނޑުގެ އެހެން ހުރިހާ ތަނެއްގެ ފޮޓޯ ނެގުމަށް ކްރިމިނަލް ކޯޓުން އަމުރެއް ނެރުމާ ގުޅިގެން އެ މައްސަލަ ވަނީ ހޫނުވެފަ އެވެ.
ޗިލްޑްރަން އޮމްބަޑްސްޕާސަންގެ އޮފީހުން ފުލުހުންގެ ދެއްކި ވާހަކަތައް ދޮގުކުރިއިރު، އެމްޑީޕީން ތުހުމަތުކުރާ ގޮތުގައި ފުލުހުންގެ ތަހުގީގު ހިންގަނީ ފަސްޓްލޭޑީ ސާޖިދާ މުހައްމަދުގެ އަމުރަށެވެ. އެހެން ނަމަވެސް ފަސްޓްލޭޑީ ސާޖިދާގެ ވަކީލު، އާޒިމާ ޝުކޫރު ވަނީ ފުލުހުންގެ ތަހުގީގާ، ސާޖިދާގެ ފަރާތުން ފެމިލީ ކޯޓަށް ހުށަހެޅި މައްސަލައާ އެއްވެސް ގުޅުމެއް ނެތް ކަމަށް ބުނެފަ އެވެ.
