ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން މެމްބަރު ސައުދު ވިދާޅުވީ ރާއްޖެއަށް ދިމާވެފައިވާ މި އިގްތިސާދީ ދަތި ވަގުތުގައި ފިނޭންސް މިނިސްޓަރު އެދިވަޑައިގަންނަވާ ހުއްދަ ދޭންޖެހޭ ކަމަށެވެ.
އެހެން ނަމަވެސް އެ ހުއްދައަކީ ޒަމާނުއްސުރެއް ދިވެހި ދައުލަތުގެ ތެރޭގައި އޮތް ވައްކަމާއި ކޮރަޕްޝަނަށް ދެވޭ ހުއްދައެއް ނޫންކަމަށް ވިދާޅުވި އެވެ. އަދި ފިނޭންސް މިނިސްޓަރު އެދިގެން ދޫކުރާ 4.2 ބިލިއަން ރުފިޔާ އަކީ ވައްކަމަށް ދޫކުރާ ފައިސާއަށް ވެގެން ނުވާނެ ކަމަށް ވިދާޅުވި އެވެ.
ސައުދު ވިދާޅުވީ މި ފައިސާ އަކީ ދިވެހި ރައްޔިތުންގެ ފައިސާ ކަމަށާއި، އިހުނަށްވުރެއް ބޮޑަށް ރައްޔިތުންނަށް ފައިސާ މުހިންމު ވެފައިވާކަމަށެވެ. އަދި ރައްޔިތުންގެ ފައިސާއަށް އަމާނާތްތެރިވާން ޖެހޭނެކަމަށް ވެސް ސައުދު ވިދާޅުވި އެވެ.
މީގެ އިތުރުން ވާހަކަ ދައްކަވަމުން ސައުދު ވިދާޅުވީ މިވަގުތުގައި އިގްތިސާދު ނަގާ ކޮޅަށް ޖެހުމަށް މަސްވެރިން ގިނަ މަސައްކަތްތަކެއް ކުރަމުން ދާކަމަށެވެ. އަދި މިވަގުތުގައި ވެސް މަސްވެރިން މާކަނޑުތަކަށް ނިކުތުމަކީ އިގްތިސާދު ކުރިއެރުމަށް ލިބޭ ފުރުސަތެއް ކަމަށް ވިދާޅުވި އެވެ.
ސައުދު ވިދާޅުވީ މަސްވެރިކަމުގެ ސިނާއަތް ކޮވިޑް19 އިން ސަލާމަތްކުރުމަށް މަސައްކަތްކުރަންޖެހޭ ކަމަށެވެ.
