އެމީހަކަށް ގަނެވުނު ވަރަކުން ބަސްތަ ބަސްތާއިން ހަނޑޫ، ހަކުރު، ފުށް ގަނެ ގޭގައި ރައްކާ ކުރަން ފެށި އެވެ. ކޭސް ކޭހުން ކާބޯތަކެތި ގަނެ ގޭގައި ބައްކުރަން ފެށި އެވެ. ދެން އެހެން މީހަކަށް ނުލިބިދާނެ ކަމުގެ އެއްވެސް ވިސްނުމެއް ނެތިއެވެ. އަމިއްލަ މީހާގެ ފައިދާ އަށެވެ.
މާލޭގައި ބަލި ފެތުރެންފަށައި މުޅި މާލެ ސަރަހައްދު ލޮކްޑައުން ކޮށްފައިވާ މި ދަނޑިވަޅުގައި ކާބޯތަކެތި ނުލިބޭ އެތައް އާއިލާތަކެއް އެބަ ތިއްބެވެ. ފިހާރަތަކުން ލިބެން ނެތުމުން އެއްޗެހި ނުގަނެވި ތިބި މީހުންނާއި އެއްވެސް ފައިސާ އެއް ނެތުމުން ކާނެ އެއްޗެއް ހޯދިފައި ނުވާ އެއްތައް ބަޔަކު މާލޭގައި އެބަ އުޅެއެވެ.
އާއިލާތައް ބޯހިޔާ ވަހިކަން ބޭނުންވެ މަގުމަތިވެފައި ވާއިރު، އަނގަޔާއި އަތާ ދިމާނުވާ މީީހުން އެއްދުވަހުން އަނެއް ދުވަހަށް ދަނީ މާލޭ ގައި ގިނަވަމުންނެވެ. އެތައް ބަޔަކަށް ސަރުކާރުން ބޯހިޔާ ވަހިކަން ފޯރުކޮށްދޭން ނިންމާފައި ވާއިރު، މިފަދަ މީހުނަށް އެހީތެރިވުމަކީ ލިބޭ މީހުން ކުރަން ވާނެ ކަމެކެވެ.
ކިތަންމެ ކުޑަ ކުޑަ އެހީ އަކީ ވެސް ހާލުގައި ޖެހިފައިތިބި މީހުންނަށް ވަރަށް ބޮޑު އެހީ އަކަށް ވެގެން ދާނެ އެވެ. އެކަންތައް އެމީހާ ދުވަހަކު ވެސް ހަނދާނެއް ނުނެތޭނެ އެވެ.
މަސް، ދެމަސް ވަންދެން ބޭނުން ކުރެވޭހާ ކާބޯތަކެތި ހުރި މީހުން ގުދަންތަކުން ދެތިން މީހަކަށް ކާބޯތަކެތި ފޯރުކޮށްދިނަސް އަތުން އެއްޗެއް މަދުވެގެން ނުދާނެ އެވެ.
މިހާލަތުގައި ބަރަކާތްތެރި ރަމަޟާން މަހާއި ކުރިމަތިލާން ޖެހިފައި ވާއިރު، ރޯދަ ވިއްލާނެ އެއްޗެހި އާއިލާއަކަށް ފޯރުކޮށް ދިނުމުން އެކަމުގެ ސަވާބު ލިބިގެންދާނެ އެވެ.
ރަމަޟާން މަހުގެ އަޅުކަން ތަކުގެ އިތުރުން މިފަދަ ހެޔޮ އަމަލެއް ކުރުމުން ތިމާއަށް ރަމަޟާން މަސް އިތުރަށް ފުރިހަމަވެގެންދާނެ އެވެ.
ގޭގައި ތިބެގެން އެއްޗެހި އޯޑަރު ކުރާއިރު، އެތަކެތި ގެއާ ހަމައަށް ގެނެސްދޭ ބިދޭސީ މީހާއަށް ވެސް ކާއެއްޗެއް ދިއްކޮށް ލުމަކީ ހަމަ ކުރެވިދާނެ ކަމެކެވެ.
ހުކުރު ދުވަހު ރަމަޟާން މަސް ފެށޭ އިރު، ރައްޖޭގައި ދިރިއުޅޭ ކޮންމެ މުސްލިމަކީ ވެސް ހާރަށް ކާނެ އެއްޗެއް ހުރި މީހަކަށް ހަދަމާ ހެއްޔެވެ. ކޮންމެ މުސްލަމަކީ ވެސް ބޯފެން ކޮޅަކާއި ކަނދުރު ކޮޅެއްގެ އިތުރުން އޮއްޓަރު ހުރި ރަނގަޅު ކާ އެއްޗެއް ރޯދަ ވީއްލަން ލިބޭނެ މީހަކަށް ހެދުމަށް މަސައްކަތް ކުރަމާ ހެއްޔެވެ.
އެމީހަކަށް ވެވުނު ވަރަކުން އަވައްޓެރިންނަށާއި ހާލުގައި ޖެހިފައިވާ މީހުންނަށް އެހީތެރިވަމާ ހެއްޔެވެ.
