ޔުމްނު ވެއްޓުނު ހާދިސާ ހިނގިތާ ހަފްތާެއެއް ފަހުން ޔުމްނު އިތުރު ފަރުވައަށް މެލޭޝިޔާއަށް ގެންދިޔައީ މިދިޔަ ހޮނިހިރު ދުވަހުގެ ރެއެވެ. އައިޖީއެމްއެޗުގައި ފަރުވާދިނުމަށްފަހު މެލޭޝިޔާއަށް ޔުމްނު ގެންދިޔައިރުވެސް އޭނާގެ ހާލު ސީރިއަސްކަމަށް އާއިލާއިން ބުނެއެވެ.
އެ ހާދިސާއަށްފަހު ޔުމްނުއަށް ލިބުނު ޒަހަމްތަކަށް ފަރުވާދިނުމަށް ހަދަންޖެހޭ އެންމެ ނުރައްކާތެރި ސާޖަރީ އިއްޔެ ވަނީ ހަދާފައެވެ. ޔުމްނުގެ ކަނދުރާގެ ތިރީބައި ބިންދައިގެން ގޮސްފައިވާތީ އެކަމަށް ފަރުވާދިނުމަށް އިއްޔެ ހެދި ސާޖަރީވަނީ ގާތްގަޑަކަށް 5 ގަޑިއިރަށް ދެމިގެން ގޮސްފައެވެ.
އިއްޔެގެ ސާޖަރީއަށް ފަހު މިއަދު ޔުމްނުގެ ހާލު އޭނާއަށް ހެޔޮ އެދޭ ފަރާތްތަކަށް ބުނެދެމުން ޔުމްނުގެ ޅިޔަނު މުހައްމަދު މުއުމިން 'އެކްސް'ގައި ކުރި ޕޯސްޓެއްގައި ބުނީ ޔުމްނުއަށް ކުރި އެރުން އަންނަކަމަށެވެ.
މުއުމިން ބުނީ ޔުމްނު ހެޔޮ ހާލަށް އައުމަށް އަދިވެސް އަންނަނީ ހަނގުރާމަކުރަމުން ކަމަށެވެ. އެހެންނަމަވެސް ފަރުވާ ލިބެމުން އަންނަކަން އޭނާ ފާހަގަކުރިއެވެ.
ޔުމްނުގެ ފަރުވާގެ ކަންކަން ރަނގަޅަށް ހިގައްޖެނަމަ ދުވަސްކޮޅަކުން އޭނާއަށް ތެދުވެ އިށީދެވެސް އިދެވޭނެކަމަށް ރޭ މުއުމިން އެކްސްގައި ކުރި ޕޯސްޓްގައި ވަނީ ބުނެފައެވެ.
ޔުމްނު ވެއްޓުނު ރޭ އޭނާއާއި އެކު އުޅުނު ރައުދު އަހުމަދު ޒިލާލްގެ ބަންދަށް ކޯޓުން މިއަދު ވަނީ އިތުރު 10 ދުވަސް ޖަހާފައެވެ. މީ އޭނާގެ ބަންދުގެ މުއްދަތު އިތުރުކުރި ދެވަނަ ފަހަރެވެ.
